ما ادري عن صحة هاذي الخريطة وهل هي لاتزال معتمدة لاكن فيها اشياء غير منطقية بالنسبة لي
1- ليش الجسر البري يبدا من المجمعة الى ثول وليس من الرياض الى جدة (ممكن يكون المسالة بسبب التضاريس لاكنها متشابهة)
اذا كان هذا الخط المعتمد للجسر البري ماله فايدة للركاب صراحة بيكون 5-6 ساعات للركاب !
2- ليش فيه خط جديد للمنطقة الشرقية من الرياض للدمام مباشرة !
الشرقية حاليا فيها خطين من الرياض الى الهفوف و من الرياض للخرج لحرض للهفوف
اذا كان المقصد تطوير الخط فا الافضل هو تطوير الخط الحالي عن طريق
تطوير خط الرياض الخرج حرض الهفوف الدمام وجعله مزدوج كامل المسافة ومنفصل عن خط الرياض الهفوف ليكون يخدم قطارات الشحن
و خط الرياض الهفوف يكون خط مزدوج للركاب فقط وزيادة السرعة الى 200 كا قطار الشمال وتقليل فترة التوقف في الهفوف وبقيق وتشغيل رحلات اكسبرس بدون توقف من الرياض للدمام
السبب الوحيد المنطقي لاضافة خط جديد هو خط قطار سريع من الرياض الى الدمام مع ذالك الافضل ان يكون مرورا بالهفوف لان سكان الاحساء عددهم كبير لتكون الرحلة ساعة الى الهفوف و ساعة ونصف الى الدمام من الرياض
صراحة من مشاكل قطار سار الي تسبب بطول الرحلة الغير مبرر هو حاجتين
1- الفحص الامني
ماله اي داعي دول العالم اغلبها القطارات بين المدن كانك تركب مترو اذا خايف من مسالة التهريب حط شرطة ومعهم كلاب الي تشم المخدرات وغيرها واي شخص تشتبه فيه وقفه على جنب نفس الي يصير اذا رحت في السيارة ولا الباص ليش التفتيش وتعقيد المسالة ؟ القطار ليس طائرة مشكلتنا اننا عاملناه كالطيارة المحطات خارج مراكز المدن فيها اجرئات دخول طويلة وتشحن شنطك
2- شحن الشنط
وهذا الي يرفع الضغط صراحة ولا افهم الشخص الي قرر يعملها ليش ؟
الي يصير في اغلب دول العالم القطار شنطك تحطها معك في نفس القاطرة تدخل وتطلع معك
اما عندنا القطار حاطين قاطرة كاملة لشحن الامتعة في كل وقوف لازم تفرغ امتعة الركاب الي بينزلون في المحطة وبعدها تحطها في سيور شنط زي حقت المطار !
طبعا ليش هاذي مشكلة ؟ اولا انها تطول وقوف القطار في المحطات وتاخر الناس الي رايحة لاخر محطة مثلا في قطار الشمال يوقف القطار 10 دقايق في المحطة فقط عشان العفش لازم يجون عمال ينزلونه ! وبعدها تقعد نص ساعة تنتظر يشتغل السير وتدور شنطتك !
الواضح الي كان ماسك موضوع سار يشتغل في الخطوط السعودية
