مش كل الايجار القديم وحدات سكنية أصلا.. بص دا مقال من شهرين اقرأوه براحتكم
----------------------------------------------------------------------------------------
الأيام الماضية كان في خناقة في مجلس الشعب بين أعضاء المجلس من ناحية المدافعين عن المواطن الغلبان اللي ساكن في إيجار قديم وبين الحكومة اللي عاوزه تنفذ حكم المحكمة الدستورية ببطلان الإيجار القديم... وهنا تيجي أصعب معضلة بعيد عن كوميديا الصراع دا.
لما يبقى في وضع مش مظبوط بيتم لعشرات السنين فهنا يتحول إلى حق مكتسب بيتم بناء الكثير من الخطوات عليه وبيكون إصلاحه معقد؛ يعني كمثال في عضو مجلس شعب قال أنا جدتي ساكنه في المهندسين في إيجار قديم فإزاي عاوزين تطلعوا وتنقلولها لسكن بديل في الأسمرات مثلاً؛ وافهم معايا المشكلة فين دلوقتي.
جدة النائب (هنستخدمها كمثال لإني معرفش حتى اسم النائب) سيدة كبيرة السن عالمعاش طبعاً وعايشة في شقة في المهندسين دلوقتي بقالها 50+ سنة وغالباً بتدفع مبلغ أقل من 50 جنية؛ بغض النظر هي معندهاش تصور إنها هتطلع من المهندسين خلاص؛ وكمان ممكن في حالات تانية معندهاش فلوس تسكن في المهندسين بالإيجار الحقيقي. فدلوقتي ايه الحل في الوضع اللي استمر أكثر من نصف قرن غلط؟
الفريق اللي عنده أملاك إيجار قديم ومؤيديه بيقول احنا اتظلمنا سنين يبقى خلاص استخدم الساطور واديهم ولو شايف انهم هيتظلموا فعادي الدنيا دوارة وكل واحد يتظلم شوية وأنا كان إيه ذنبي لما يطلع جمال عبد الناصر في يوم ياخد قرار خفض الإيجارات 25% مثلاً زي ما عمل؟ اه ناصر كان بيطلع الصبح يقرر تخفيض الإيجارات ويصبح دا الإيجار الجديد للشعب غصب عن المالك.
الفريق الثاني وهو المستأجرين شايف إن الإيجار كان مناسب جداً في الخمسينات والستينات ثم بقى نص نص في السبعينات؛ لكن آخر 40 سنة الجنية المصري فقد 99% من قيمته (دا بجد مش مبالغه يعني 1 جنية في 1985 تساوي 100 جنية النهاردة)؛ فجايين تحاسبوني أنا على ال 40 سنة دول؟ هو أنا اللي فقدت الجنية 99 قرش.
مش كل اللي ساكن في إيجار قديم فقير ومعدم؛ كلنا نعرف ناس ساكنه في إيجار قديم ومعاها عربيات حديثه وعندها شقة في الشيخ زايد والرحاب ومدينتي وبعضهم بيدفع 30 جنية إيجار و 3000 جنية كهرباء.
لكن برضك في ناس عجوزة عالمعاش موظفين كبار السن وإن كانوا أقليه لإن غالبية عقود الإيجار القديم تمت قبل 30+ سنة يعني غالباً طرفي العقد ماتوا... وفي شقق اللي عالمعاش فيها دول أبناء مش طرف أول؛ لكن الخلاصة في ناس فعلاً غلبانه يبقى نعمل ايه؟ هيجيبوا منين الناس دي انك تقولهم إيجارك ال 50 جنية بقى 7000 جنية؟
هنا بقى لو إنتا عاوز تصلح بتعمل ايه؟ الإجابة من وجهة نظري سياسة قصقصة الريش يعني نحاول نفرق بين القادر وغير القادر بحيث نوصل مين فعلاً متضرر.
طبقاً للجهاز المركزي والتعبئة والإحصاء فإن عدد وحدات الإيجار القديم في مصر 3.02 مليون وحدة عبارة عن 1.643 مليون وحدة سكنية و 1.377 مليون وحدة غير سكنية.
عندنا 1.377 مليون وحدة غير سكنية ودول عبارة مثلاً عن 500452 محل و 796652 شقة (تستخدم غير سكني زي مخزن أو شركة) و 6088 جراج و 3425 كشك ووو بل إن في 12 عوامة في إحصائية المركزي. دول بقى نشاط تجاري يعني؟ يعني مش بيبع أكيد بأسعار 1960 بل بأسعار اليوم يعني هو شخص عايش بسعر اليوم ودخله سعر اليوم فدا ياخد 12 شهر بعدها يحرر العقد.
النقطة بقى هي في 1 مليون و 642 ألف و 870 شقة إيجار قديم سكني (حسب تعداد 2017) فدول بقى نشتغل عليهم قصقصة الريش اللي قولناها ودا يتم كالتالي
المغلق: وحسب الجهاز المركزي في 300 ألف شقة إيجار قديم مغلقة دول بقى تثبت انهم مغلقين عن طريق فواتير الكهرباء آخر 12 شهر السابقين لحكم المحكمة (عشان حركات الناس اللي تروح فاتحه البيت المقفول وتقعد فيه من باب أهو قاعدين؛ لا يا بابا هنجيب استهلاك الكهرباء آخر سنة أو سنتين ونشوف). اللي يطلع مغلق خلاص 6 شهور مهلة للمؤجر يخلي المكان.
الأملاك: نستخدم سيستم الحكومة وخاصة مصلحة الضرائب مع الكهرباء مع البنك المركزي ونشوف المستأجر دا عنده أملاك؟ شقة تانية أو فيلا أو شاليه أو شركة أو مصنع أو أو ... شيء يثبت إنه شخص معاه أملاك ويقدر لو خرج يقعد في سكن تاني معاه فلوس مش غلبان.
الإنفاق العالي: دي بقى من سيستم التموين اللي بيعملوه بالتعاون مع كل الجهات بما فيها شركات الاتصالات؛ هاتلي يا ولدي استهلاك العيلة دي؛ فواتير موبايل وإنترنت وكهرباء ومياه ومصاريف مدارس وجامعات ومخالفات مرور ووو... لقيت العيلة دي بتصرف ليكن 100+ ألف جنية سنوي يبقى خلاص انتم قادرين على تحمل إيجار مش غلابة.
البنك: هنا بقى الفريق اللي فاضل ودول عن طريق موافقتهم الشخصية لازم يتم فحص أرصدتهم البنكية وحركاتها آخر 3 سنين لو طلع إنه شخص ما شاء الله عنده ما يمكنه من دفع إيجار؛ برضك مع السلامة... ليييه الخطوة دي؟ عشان ممكن شخص عنده 50-60 سنة مثلاً عياله اتجوزوا وهو عايش مع زوجته في الشقة؛ مش مهتم يشتري أملاك تانية وهو طلع معاش ومعاه مليون جنية في البنك حاططها في شهادة البنك الأهلي بتطلع له 20 ألف جنية شهري... دا تكشف أملاك متلاقيش؛ موبايل مش بيرغي؛ كهرباء هي أوضة واحدة فيها تكييف فمش كثير؛ مصاريف مدارس وجامعات لا خلاص العيال كبرت. فمش هيتقفش بالطريقة السابقة.
الفكرة في الإجرائات هي إن المواطن العادي بيدفع 5-10 آلاف جنية شهري إيجار؛ العائلات اللي في إيجار قديم بتوفر المبلغ دا شهري فممكن عبر التوفير دا لعشرات السنين تكون كونت ثروة صغيرة فمعلش بقى استخدمها لدفع الإيجار زي باقي الناس.
ونكمل بقى بعض الخطوات زي كده لغاية ما يفضل عندنا أظن 300-400 ألف بالكثير قوي دول فعلاً ناس في إيجار قديم بس فعلياً معندهمش ولو خرجوا هيبقوا في الشارع فهنا تتحمل الدولة دورها.
مين عمل الإيجار القديم؟ الملك فاروق ثم ثبته عبد الناصر؛ يعني الحكومة... هنا بقى الحكومة المسئولة تشيل المسئولية عن الغلابة دول؛ تعمل جدول زمني ليكن 5 سنين فيه توفر لهم سكن بديل بأسعار رمزيه يعني مبلغ يقل عن ألف جنية؛ بل المفروض يتم فحص الحالات اللي ساكنه دي بواسطة وزارة التضامن واللي يثبت إنه غير قادر يعفى من الإيجار... وطبعاً المقصود هنا كبار السن اللي ساكنين لإن حرام تمرمط الناس في أواخر عمرهم؛ لكن السكن البديل الحكومي دا لا يمتد للورثة؛ مهواش ايجار قديم لكن عند الدولة؛ دا ل بابا وماما العواجيز يا مواطن عشان متعش في الدور وتقول تتجوز عندهم والسكنة تستمر.
بس يا سيدي وبكده يبقى أنتا بدل ما تاخد الكل عاطل في باطل؛ سعيت بأقصى جهد إنك تقلل الضرر... هو مستحيل مستحيل ميتضررش حد لإن أي إصلاح ليه ضحايا لكن مش معنى كده اضرب في الكل بدون تمييز. ودي كانت وجهة نظري واللي عاوز يشتم ويتخانق ويعيش في قصص أصل جدو دفع 3 أضعاف سعر الشقة خلو عشان يسكن فيها؛ طيب مشترهاش ليه؟ لا ملوش نفس.... لا أصل الناس دول عاشوا كثير ببلاش ليه تخلي الملاك يستحملوا 5 سنين كمان اطردهم فوراً... معلش يعني استحملت 60 سنة وجت على 5 خلاص؟ يا جبروتك يا أخي دول جيرانك نص قرن للدرجة دي مش طايقين بعض؟
