تعليق صديقي المحلل الاقتصادي
محمد نجم
الطرح فى البورصة دى اجمل حاجة اتقالت النهاردة فى افتتاح المشاريع، طبعا فيه كلام تاني مهم، لكن مفيش قرار له أثر كبير طويل الاجل ومستدام وواسع النطاق، مماثل لقرار طرح شركة حكومية فى البورصة بمقاس وحجم شركة "العاصمة الادارية"، واللى بتمنى من كل قلبي يتغير إسمها عشان اسم "العاصمة الادارية" دة مش ملائم إطلاقاً.
.
الطرح فى البورصة يعني ايه؟
.
- تطبيق قواعد الحوكمة وإعلان البيانات للعامة، وفتح باب المشاركة للناس فى المشاريع ، يعني الناس هتبقي مساهمة حقيقية فى بناء البلد وتدشين مشاريعها وبالتالي يزيد حرصهم فى الحفاظ عليها، ومكاسب تانية كتير.
.
الشركات الحكومية موجودة فى كل حتة فى العالم، إعمل سيرش بـ : SOE's او State owned Enterprises، مثلا الصين فيها 150 ألف شركة وهى اكبر دولة فيها شركات من النوع دة، بيشتغل فى الشركات دى 54 مليون موظف صيني، بتساهم بـ 25% من الاقتصاد/الناتج.
فى قائمة اكبر 500 شركة فى العالم، الSOE's الصينية ليها 91 شركة، زي هواوي مثلا او سينوبيك او ستيت جريد.
.
الشركات المملوكة للدولة مش اختراع مصري، ولا له علاقة بالاشتراكية، الشركات دي وجودها مهم حتى لو بعض المؤسسات الدولية شايفة اننا نتخلص منها ونخصخصها، ولو انت مصدق ان الاقتصادات الغربية الديمقراطية مفيهاش تدخل حكومي فى مسار عمل الشركات الخاصة، تبقى ساذج .
.
مينفعش يحصل تخارج كامل للدولة من الشركات دي، اه فعلا محتاجين نفتح الباب للقطاع الخاص مع الحكومة فى الوحدات/الشركات دي ونقلل من دور الحكومة الفترة الجاية لأن خلاص أصبح مش ضروري والإقتصاد اتحرك وعدينا الفترة الصعبة، دة دور بيعمله الصندوق السيادي، لكن تخارج الحكومة بالكامل من كل واي حاجة لمجرد إرضاء ناس/مؤسسات معينة، دة قرار غير سليم ومش هيحصل.
.
العاصمة الادارية من الناحية المالية، هى أنجح مشروع مصري على الإطلاق وانا اقصد هنا من الناحية المالية البحتة مش السياسية ومش الانسانية ومش التاريخية، لكن مالياً "العاصمة الادارية" كانت الانجح لانها كانت Self-dependence funding module أو نموذج للتمويل الذاتي.
.
لم تُكلف الدولة قرش واحد وعملت أرباح خيالية، ومبيعات بيع الاراضي وصلت لـ 500 مليار جنيه، حولت الصحرا لدهب حرفياً مش مجازياً مع حجم أصول بيتجاوز الـ 4 تريليون جنيه.
.
الاهم من كدة، الشركات الحكومية اللى فيها مساهمات من الهيئة الهندسية للقوات المسلحة زي شركة "العاصمة الادارية" لما تُطرح فى البورصة دة بيحسن جدا من صورة الاقتصاد المصري فى الخارج، بيثبت أننا جادين فى الإصلاح والتطوير والتحديث ومواكبة التغيرات الاقتصادية العالمية والاتجاهات الجديدة فى إدارة موارد الدول.
.
انا لما شوفت إكتتاب شركة "ارامكو" السعودية اتمنيت - وكتبت دة فعلا فى بوست - إن بلدي يكون عندها مشروع ناجح زي دة وتطرحه للإكتتاب فى البورصة.
.
شوف قد ايه السعوديين مؤمنين بحلمهم وبقيادتهم وعايزين يبنو بلدهم، وأقبلوا علي شراء السهم للدرجة ان من بين كل اسرة سعودية فيها واحد على الاقل يحمل السهم بإجمالي مشاركة بلغت = 4.9 مليون سعودي ساهموا بمبالغ مقدارها = 47.4 مليار ريال بإجمالي كمية = 1.5 مليار سهم.
.
مصر معندهاش بترول فعلا، كوريا والصين كمان معندهمش بترول، لكن احنا عندنا قدرات كامنة هائلة جدا ومتنوعة مش محتاجة غير تحفيز وإستخدام ذكي، القدرات الكامنة دي لما بيتم تحفيزها التحفيز الملائم بتكون سبب فى تحقيق معدلات نمو وتنمية خيالية وبدون موارد طبيعية، ودة اللى حصل فى مشروع العاصمة ومشاريع تانية كتير، ودى السبب الأساسي فى الانتقال من حافة الهاوية واقتصاد مفكك لأسرع اقتصاد ينمو فى المنطقة.
