المؤسسة العامة للحبوب: زيادة أسعار الشعير العلفي 49.35 ريال للكيس بدلا من 46.2 ريال

[سعودي والعز عنواني]

كلامك غير منطقي مافيه شيء اسمه 10 أكياس في اليوم ل 100 رأس!

و حتى 5 أكياس مبالغ فيها و لا تنفع
و ما قد شفت أحد يحط شعير فقط بدون أي شيء.

انا كاتب ١٠ اكياس ل ١٠٠٠ رأس وايس ١٠٠ اقراء صح

 

[سعودي والعز عنواني]

مافيه شي يجبره ينقص السعر ، حلاله بيتكاثر عنده وبياكل منه ويبيع بالسعر اللي يبيه

وابسط اسس الاقتصاد تقولك هذا ركود اقتصادي مو تخفيض اسعار ركز بارك الله فيك

ما فيه شيء اسمه ابيع بالي ابي السوق يحكمني

كذلك الطلي اذا تعدا سنه او صار ثني تبداء تنزل قيمته بشكل كبير

 

[سعودي والعز عنواني]

هههههههههههههه يارجل المربي مايشتري كيس واحد الراس تكلفته ٢.٥ -٣ ريال يوميا تقريبا تزيدها اكثر من كذا مصيبه يطلع تكلفه التيس ٦٣٠ مع ٢٥٪ قيمه اهلاك الام ٧٨٠ سعر التكلفه مع ١٠٪ ربح لصاحب المزرعه ٨٥٠ تقريبا مع ١٠٪ للشريطي او المورد للسوق ٩٤٠ قيمه تيس ٧ شهور !!!١
للاسف الغنم المحليه في طريقها للتناقص

وكل مازاد الشعير زادت عليك يالمستهلك النهائي وعلى المربي المسكين


*ملاحظه الحساب لم يضف تعويض النفوق من الحلال والمفترض تكون ١٠-٢٠٪ من قيمه الراس

حسبتك مبالغ فيها

 

[سعودي والعز عنواني]

ياخي انتو حفله كل ارتفاع بالاسعار يبرر برفع الدعم

يوم كان ب ٩ ريال تقدر تقول عليه مدعوم اما الحين سعر كيس الشعير واصل ٥٠ ريال وتقول مدعوم ورفع تدريجي ؟

كيف مدعوم وله اكثر من عشرين سنه يرتفع باستمرار

الان الدوله تربح من كل كيس شعير يتم بيعة 16 ريال


تجارة ضخمة

 

[سعودي والعز عنواني]

لا عمر مربي الغنم ما انجبر يبيع الا لحاجته للكاش , اما البيع بسعر مايناسبه يحتفض فيها وياكل منها وان لزم ذبح وعلى الثلاجه

مافيه شيء يجبر المربي يبيع بسعر رخيص غير انخفاض تكلفه التربيه من اعلاف ومصاريف عمال

اذا كان يزرع طماط وقتها تقدر تقول لازم يبيع

حبيبي على بالك المربي الي عنده 100 او ٥٠ راس غنم بينتج انتاج يستاهل السوق لاء


المربين الكبار هم الي يبيعون كيف تبغاه يصرف على ١٠ الاف راس او ٣٠ االف راس

رسلان لا تتفلسف

 

[سعودي والعز عنواني]

الرجال فوق يشرح لك التكاليف.. الراس يكلف شعير 3 ريال يوميا يعني لو 1000 راس هذي 3000 ريال يوميا.. من غير باقي التكاليف.. لو كبر راسه وما باع من فين يدفعها؟

٣ ريال شعير !!!!!!!


ليه هو ثور ياكل ٣ كيلو في اليوم

 

[سعودي والعز عنواني]

اللي عنده ١٠٠٠ راس هذا عنده القدره الماليه يشتري علف بالسعر الغالي بدون مايبيع ، وضحت الفكره ؟

غنمه عنده بتتكاثر ومافيه شي يجبره على البيع بسعر رخيص

انت اللي محتاج اللحم مو هو ، وارتفاع الاسعار مرتبط بارتفاع اسعار العلف وسالفه ان الركود بيجبره يبيع هذا اذا كان عندك بديل لحوم ارخص فقط وطبعا هذا غير موجود لان حتى المستورد رفعت اسعار جمركته سواء حي او مذبوح

يا منطق لست منطق بعد اليوم


رسلان هو المنطق وهو مؤسس الثورة الفكرية الحديثة

 

[MIA1]

كل مئة رأس من الغنم يكفيها

كيس شعير واحد في حال كان الوضع تسمين
اربع عقد برسيم
عقدتين رودس فقط او عقده قصب وعقده رودس

يفضل ان يكون الشعير مجروش ويقسم على وجبتين

ماشاء الله عليك
كأنك عند حلالي مع إختلافات بسيطة

انا كاتب ١٠ اكياس ل ١٠٠٠ رأس وايس ١٠٠ اقراء صح

ركز
الرد على العضو الآخر
و اقراء تكتب اقرأ

 

[سعودي والعز عنواني]

انت تقول العكس

نقع الشعير يطري الحبه ويسرع هضمها بالكامل عكس الناشفه يطلع اغلبه بدون هضم لان الشعير الياف والالياف صعب هضمها لهذا يتم نقعه او جرشه

وهذا نشوفه عندنا لا ينفخ بطن ولا شي
الا تصير متعافيه من اللحم والشحم

ابحث عن كلام المتخصصين في تغذيه الحيوانات وبتشوف بنفسك

الجرش افضل من النقع

النقع لا يحدث مشاكل للغنم

ولكن بعد تحاليل تم اجرائها من عدة مربين

بين الشعير المنقوع و الشعير الكامل او المجروش

وجدو ان الشعير المنقوع اقل في نسبة البروتين من الشعير العادي او المجروش

حيث ان الماء الذي ينقع فيه الشعير يمتص العناصر من الشعير

 

[رٍسِـــلآنٍ]

هذي بهيمة خلقها الله لتأكل العشب وليس الحبوب او التمر او الخبز


تعليفك لازم يكون اعلاف مالئة
مرتفعة البروتين

وليس التعليف بما تقوله انت لأن الي تقوله الان يفسد طعم اللحم

والتمر ليس له فائدة غذائية للغنم


للعلم انا وصفة تعليفي لصنف الحري

عندك كتلوج جاي مع الغنم مكتوب عليه هذي تاكل العشب بس ؟

انت تفتي معليش ، الاعشاب اللي تاكلها الاغنام اصلا يكون فيها بذور وهي مفيده لهم سواء الذره او القطن او الشعير

مشكلتكم عايشين على نظام تقليدي في التعليف ولا تشوفون العالم حولكم وتعتقدون ان الطريقه اللي تعرفونها هي الصحيحه وغيرها كل شي غلط

اجل لو اقولك عن خلطه التمر والعوم وش بتقول ؟

انكارك فائده التمر للاغنام ماراح يخلي التمر غير مفيد للاغنام

وهذا لا يفسد طعم اللحم بل على العكس يخليه اطيب والذ من الخرفان المتصحره اللي ماتشوف من الاكل الا نوعين بالكثير

 

[رٍسِـــلآنٍ]

الجرش افضل من النقع

النقع لا يحدث مشاكل للغنم

ولكن بعد تحاليل تم اجرائها من عدة مربين

بين الشعير المنقوع و الشعير الكامل او المجروش

وجدو ان الشعير المنقوع اقل في نسبة البروتين من الشعير العادي او المجروش

حيث ان الماء الذي ينقع فيه الشعير يمتص العناصر من الشعير

عندك لبس وفهم خاطئ لنقع الشعير

نقع الشعير في الماء حتى يشرب الماء كله

نقع مو غسيل ركز الفرق كبير بينهم

يوجد من يغسل الشعير وتروح كثير من فوائد الشعير في الماء المسكوب

ولكن نقع الشعير الصحيح يكون حتى يمتص الماء كله ولا يبقى قطره في السطل ، وين بتختفي الفوائد والماء فيها ؟ وضحت الفكره ؟

 

[سعودي والعز عنواني]

عندك كتلوج جاي مع الغنم مكتوب عليه هذي تاكل العشب بس ؟

انت تفتي معليش ، الاعشاب اللي تاكلها الاغنام اصلا يكون فيها بذور وهي مفيده لهم سواء الذره او القطن او الشعير

مشكلتكم عايشين على نظام تقليدي في التعليف ولا تشوفون العالم حولكم وتعتقدون ان الطريقه اللي تعرفونها هي الصحيحه وغيرها كل شي غلط

اجل لو اقولك عن خلطه التمر والعوم وش بتقول ؟

انكارك فائده التمر للاغنام ماراح يخلي التمر غير مفيد للاغنام

وهذا لا يفسد طعم اللحم بل على العكس يخليه اطيب والذ من الخرفان المتصحره اللي ماتشوف من الاكل الا نوعين بالكثير

نظام تعليفي حققت معه ربح لا يقل عن ٤٠٪؜ في السنه الحمدلله

 

[رٍسِـــلآنٍ]

يا منطق لست منطق بعد اليوم


رسلان هو المنطق وهو مؤسس الثورة الفكرية الحديثة

بعني الحري اللي عندك على ٣٠٠ ريال لراس تدري العلف ارتفع وكذا

 

[رٍسِـــلآنٍ]

نظام تعليفي حققت معه ربح لا يقل عن ٤٠٪؜ في السنه الحمدلله

طيب وين قلت لك ان تعليفك غلط ؟

 

[سعودي والعز عنواني]

بعني الحري اللي عندك على ٣٠٠ ريال لراس تدري العلف ارتفع وكذا

يكلفك الرأس بعمر ٦ شهور حري من 700 الى 830 ﷼ وتبيعهة ب ١١٠٠ الى ١٢٠٠ على حسب السوق وحسب جودة الصنف الي تقدمة

 

[Hero of Chaos]

صنع محليا واكتفي ثم ارفع لدعم المنتج المحلي

مافيه جدوى اقتصادية اذا اني بصنع و اخر شيء يجيني منتج مستورد من بلد العمالة فيها رخيصة وتكاليف الانتاج منخفضة .. لا الداخل مستعد يشتري منتجك لارتفاع سعره بسبب ارتفاع التكاليف .. ولا انت تقدر تصدره بكميات كبيرة بسبب ارتفاع سعره وراح تتحمل تكاليف الشحن والجمارك وضرائب ...

لما ترتفع اسعار المنتجات المستوردة وقتها يصير الانتاج المحلي مجدي اذا امتلك افضلية سعرية ..

 

[رٍسِـــلآنٍ]

مافيه جدوى اقتصادية اذا اني بصنع و اخر شيء يجيني منتج مستورد من بلد العمالة فيها رخيصة وتكاليف الانتاج منخفضة .. لا الداخل مستعد يشتري منتجك لارتفاع سعره بسبب ارتفاع التكاليف .. ولا انت تقدر تصدره بكميات كبيرة بسبب ارتفاع سعره وراح تتحمل تكاليف الشحن والجمارك وضرائب ...

لما ترتفع اسعار المنتجات المستوردة وقتها يصير الانتاج المحلي مجدي اذا امتلك افضلية سعرية ..

هدفك جلد المشتري المحلي بالاسعار ولا تصنع وتصدر ؟
اذا لم تستطع منافسه المستورد محليا قفل مصنعك وشوف لك شي ثاني تنافس فيه

خفض رسوم العماله والضرائب والخدمات والمواد الخام الخ عشان تنافس مو تسوي العكس بكل شي

 

[بائع العسل]

مستحيل 10 اكياس. اذ الوالد عنده 100 راس ويحط لها يوميآ 5 اكياس.. صباح كيسين ونص والعصر كيسين ونص

5 اكياس واجد حيل
كيسين تكفي وزيادة اذا كنت تعلف معه رودس او تبن او مخلوط

100 راس كيس واحد وبرسيم يكفيها اذا مافيه مواليد

ومن تجربة
خذ علف الوافي مع البرسيم فقط انتبه من تحجر الضرع كنت اعاني من هذي المشكلة بكثرة
اما البقية ممتاز ولا يسود اللحم ولا يغير طعمه ولا شيء واللي يقول غير كذا ماجرب​

 

[بائع العسل]

نقع الشعير بالماء افضل للبهم من اكله جاف من ناحيتين

حبه الشعير تنتفخ اكثر وتشبعهم + سهوله الهضم بحيث يستفيد الغنم من كامل محتويات الشعير بهضمه كله بدل تبرز بعضه بدون هضم

غير مجدي
مكلف ومتعب للي عنده غنم واجد
كيسين في اليوم متعبة جداً

الافضل جرش الشعير او دقه وسعر الجرش ريالين او ثلاثه ريال للكيس جاهز ​

 

[رٍسِـــلآنٍ]

غير مجدي
مكلف ومتعب للي عنده غنم واجد
كيسين في اليوم متعبة جداً

الافضل جرش الشعير او دقه وسعر الجرش ريالين او ثلاثه ريال للكيس جاهز ​

كيف غير مجدي ومتعب ؟

يارجل كلها سطل او حوض حسب الكميه تنقع فيه شلون متعب