غالبيتكم يتكلم وهو مايعرف اي شيء عن الحلال ولا اسباب نزول سعره او طريقة العلف .
اولا العلف يختلف من الغنم للبهم ومن الحري للنجدي للنعيمي للعنز .
( النجدي الاعلى في استهلاك العلف ثم النعيمي ثم الحري )
لكن عموماً : ١٠٠ راس غنم يكون علفها من كيس ونص الي كيسين شعير بالاضافة للبرسيم او التبن او الرودس وغيرها ، وهذا طبعاً اذا ماكانت والد ومعها بهم لان العلف يزود عشان انتاج الحليب وصحة الشاة .
علف الطليان الي تنباع بالسوق مختلف تماماً
يعني يعتمد على العمر والنوع
مثلاً ١٠٠ خروف نعيمي عمره ٦ شهور ، يكون علفها ٢ كيس شعير بالمتوسط و ثلاث لبنان برسيم
وغالباً الناس تعتمد خلط المكعب مع الشعير للحصول على الجودة المطلوبة ، وفي حال استعمال المكعب لابد تقليل البرسيم ٥٠٪ لان كثرته مضر مع المكعب
فيه ناس يعتمدون على وضع الشعير فقط للغنم بدون اي حشائش ويكون مرتين باليوم وضعف الكمية العادية يعني ١٠٠ راس تستهلك من ٣-٤ اكياس شعير بدون اضافة اعلاف اخرى
وبالنسبة للتنقيع الشعير ،، صحيح انه يكون انفع للبهايم لكن فيه مشكله خطيرة للحلال حيث يسبب غالباً مشاكل رؤية بسبب الرطوبة وخاصة للشياة .
وجرش الشعير يكون انفع للحلال لكن تتطاير قشور الشعير في خشوم الحلال ويسبب لها مشاكل تنفسية ايضاً
وبالنسبة لاسعار الحلال في حال ارتفع العلف هي بدون شك تنحفض وبقوة للمقاني ( الغنم) وبشكل سريع . لكن للبهم والمعد للذبح يكون النزول بعد فترة ( من شهر لثلاث اشهر )
والسبب كثر العرض لان مربي الحلال وقتها راح يبيع الخروف والرخل عشان يغطي التكاليف وهذا يسبب كثرة العرض ونزول السعر ،، لكن مقدار النزول غير معروف ويعتمد على وضع الاسواق
ولا ننسى ان القوة الشرائية للمجتمع هي من يرفع او يخفض السعر بدون اي تغير على اسعار الاعلاف ،، طبعاً الكل يذكر الاسعار كيف انهارت بعد ايقاف العلاوة والبدلات مع ان اسعار الاعلاف ماتغيرت
وشكرً لكم جميعاً
