طبعا مش المفروض أنشر الكلام ده هنا
لأن ليا صفحة تانية متعلقة بشغلي وتخصصي العملي
لكن الكلام للتوضيح ولله وللوطن لأن جيوش الفتوجية شغالين الله ينور
فعشان تعرف المختصر المفيد في موضوع شحط ناقلة الحاويات العملاقة EVER GIVEN
والتابعة للشركة اليابانيةالعملاقة برضه EVERGREEN ودي من أكبر الشركات بعد ميرسك
خد شوية معلومات بسيطة كده الأول
السفينة من آخر أجيال سفن نقل الحاويات اللي بتشيل أكتر من ٢٠ ألف حاوية مكافئة ٢٠ قدم ، أكبر ناقلة في العالم دلوقتي ٢٤ ألف حاوية
حمولة السفينة الحجمية ٢٠٠٠٠٠ GT يعني الحمولة الوزنية ممكن تتجاوز أكتر من ٤٠٠ ألف طن وزن، على حسب وزن البضاعة بتختلف طبعا
طول السفينة أكتر من ٤٠٠ متر والعرض ٥٩ متر
الغاطس بقى ودا الأهم ١٥،٥ متر اللي كانت مبحرة بيه في قناة السويس
يبقى مبدئيا كده إحنا قدام جبل عائم على وش الماية
طيب إيه اللي حصل يا باشا بالظبط وليه الموضوع كبير كده
أولا حصل فقد في القدرة الكهربية على الناقلة black out ، من تصريح وكيل السفينة وكالة الخليج GAC من الآخر كده مشكلة في المولدات الرئيسية
دا بيترتب عليه إيه بقى..
فشل في منظومة الدفع والتوجيه، مهو مفيش كهربا تشغل طلمبات الزيت والتبريد للماكينات الرئيسية وكمان تعطل طلمبات تشغيل الدفة اللي هيا هيدروليك وحجمها كبير جدا
طيب هل مفيش عالمراكب منظومة طوارئ في الحالات دي
لأ طبعا في يعني، ودي إلزامي وبتدخل أوتوماتيك خلال ٦٠ ثانية
طب فين المشكلة هنا، المشكلة مش هتبقى موجودة لو إنت ماشي في بحر مفتوح، السفينة هتنحرف عن المسار شوية وتبقى زي الريشة العايمة وبعدين كل شيء يرجع لأصله بعد تشغيل المكن تاني وتوجيه الدفة ويتعدل المسار، وممكن ترمي مخطافك وتقف لحد ما تحل المشكلة
طب في قناة السويس إيه المشكلة ؟
المشكلة مش في قناة السويس بس، لكن في كل الممرات المائية الضيقة، لو فقدت الدفع أو التوجيه والريح كان عالي دا هيؤدي لانحراف مسار الناقلة، ومش هتلحق تعمل حاجة والمركب هتركب أجناب القناة مع سرعة واتجاه الريح والتيار، بسبب فشل في منظومة التوجيه للدفة أو عطل مفاجيء في الماكينات زي ما قلنا، أو خطأ بشري من المرشد أو الربان
قناة السويس بقى ليها طابع خاص لأن القاع رملي، الملاحة بتكون في المنتصف تماما عشان مقطع القناة حرف V فطبيعي إن الأجناب غاطسها قليل ومش هتقدر تحافظ عليها بمقطع حرف U بعد التكريك، مع العلم إن عملية التكريك منتظمة في القناة منذ إنشائها ، ودي من ضمن خطة الصيانة الدورية للقناة، عشان حركة السفن نفسها بتقلل الغاطس بالتدريج مع التيارات الدوامية اللي بتحصل في قاع القناة من حركة بدن السفن، والدوامات دي بتعمل تفريغ تحت بدن السفينة بيسحب الرملة من على الأجناب كمان، وبتكون السفن أكثر قابلية للجنوح والشحط كل ما زادت سرعتها، عشان كدة السرعة متحددة في القناة ب ٨ عقدة، وبيتم مرور السفن في القناة بشكل قوافل بين كل سفينة والتانية ٢ ميل بحري
وعلى كل سفينة مرشد واتصال دائم بالمراقبة في القناة، مع وجود قاطرات مصاحبة للقافلة لسرعة التصرف لو حصل انحراف وجنوح لإحدى السفن عشان منعطلش باقي القافلة، وفي قافلتين قافلة شمال وقافلة جنوب، الشمال نازلة من بورسعيد والجنوب طالعة من السويس، قافلة الشمال بتخزن المراكب في البحيرات في الاسماعيلية، لحد ما قافلة الجنوب تعدي متجهة لبورسعيد، وبعدين تنزل التانية متجهة للسويس، ودا النظام المعمول به في القناة
طب إيه اللي حصل طيب..
الناقلة EVER GIVEN انحرفت نتيجة فقد الدفع والتوجيه، ولأن سرعة الريح كانت عالية جدا، ففقدت السيطرة واستعرضت بعرض القناة وقفلتها خالص، تخيل مركب طولها ٤٠٠ متر واقفة بعرض القناة اللي هيا ٤٠٠ متر أو أقل، فقعدت بلغة أهل البحر بمقدمتها ومؤخرتها على جانبي القناة، وكلبشت في الطين يا معلم، ومقدم ومؤخر السفينة دي أساسا مناطق شغل القاطرات اللي بتشد وتدفع على المراكب، عشان يبقى في عزم في التحريك والمركب نفسها تبقى ذراع عزم على المرتكز اللي شاحط، هنا بقى المركب شحطت من الجنبين، فالقاطرات اللي اتبعتت ٦ قاطرات وهيا عملاقة بالمناسبة فيهم بركة ١ أكبر قاطرة في الشرق الأوسط ١٦٠ طن شد والباقي ٧٠ و٨٠ طن ، ملحوظة طن الشد البحري بألف طن من وزن المركب، الموضوع صعب جدا مع الأسف، الشغل هيبقى شد بس بالحبال مش تدفيع ودا أصعب، لأن القاطرات نفسها ممكن تشحط هيا كمان، حتى تخفيف الحمولة محتاج وقت كبير وامكانيات أكبر، المعلومات دلوقتي إن اللي شغال ٩ قاطرات بعد الاستعانة بقاطرتين كبار واحدة من الأردن والتانية رافعة علم بنما، دا غير القاطرة عزت عادل انضمت برضه ودي ١٦٠ طن شد كمان
الكراكة مشهور ودي أكبر كراكة في الهيئة راحت للموقع للتكريك تحت بدن السفينة لرفع الشحط وزيادة العمق
طب الموضوع يعني فيه تقصير، أؤكد لحضرتك لأ ، إنت بتتعامل مع كارثة وبتبذل أقصى جهد عندك، مش هقولك شحط البواخر بيحصل في كل حتة، بس هقولك إن المنطقة دي أسوأ منطقة ممكن تشحط فيها باخرة وكمان بالحجم ده والغاطس ده، مع ضيق عرض القناة، إنت مش في بحر مفتوح ولا حتى بحيرة، إنت في قناة ملاحية ضيقة، وربنا يكون في عون الناس الفنيين هناك، ونقول الله يعينهم لأن الموضوع كبير جدا، فنرحم نفسنا من الفتاوي شوية!!
#إيهاب_فاروق
كبير مهندسين بحريين
تحديث..
تم إضافة صورة لخطة تعويم السفينة، وربما يكرم إن شاء الله ويتم التعويم، ربنا يكون في عون الناس اللي شغالين هناك، الموضوع مش سهل بالمرة والاستعانة بالخبرات الأجنبية مش عيب
ملحوظة: أنا لا شغال في هيئة قناة السويس ولا بدافع عنها، بنبسط المعلومة فقط في حدود خبرتنا العملية ومعلوماتنا الدراسية اللي أكيد في مهندسين وقباطين كتير بنتعلم منهم ونفيد ونستفيد
ملحوظة تانية : تبقى السفينة تحت قيادة ربانها حتى مع وجود المرشد، ويمكنه الاعتراض عليه وتغييره في حالة تعريض السفينة للخطر
شكرا للصديق المهندس محمد عبدالعال على الصورة
