هذا الكلام منقول بس عجبنى للى شايفها هتحلوا تعالوا نحسب حسبة واحدة وجوزها، بيحاولوا يعيشوا حياة آدمية نوعًا ما - يعني بيمارسوا حقهم الطبيعي في أكل 3 وجبات في اليوم، وبياكلوا لحمة 15 يوم بس في الشهر.. ومرتب كل واحد فيهم من 1500 لـ2000 جنيه.
وجبة الفطار:
فول سايب 3 جنيه+ 2 بيضة 6 جنيه+ عيش5 جنيه = 14 جنيه في اليوم.. يعني 420 جنيه في الشهر.
وجبة العشاء:
تُمن جبنة أي نوع 20 جنيه+ 2 علبة زبادي 4 جنيه+ عيش 3 جنيه= 27 جنيه في اليوم.. يعني 810 في الشهر.
يبقى توتال الفطار والعشا كل شهر= 1230 جنيه.
وجبة الغدا - هنحسبها على إنهم بيطبخوا 15 يوم بس في الشهر، وباقي الأيام بياكلوا باقي اليوم اللي قبله، بمعدل 7 أيام لحمة و8 أيام فراخ:
وجبة اللحمة: نص كيلو لحمة 60 جنيه+ كيس بامية أو أي نوع طبيخ 12 جنيه تقريبًا+ كوبايتين رُز 4 جنيه ونص «لأن كيس الرز بـ9 جنيه»= اليوم واقف بـ76 جنيه ونص.. يعني الـ7 أيام 535 جنيه ونص.
وجبة الفراخ: فرخة 60 جنيه+ كيس مكرونة من الرخيصة 4 جنيه= 64 جنيه في اليوم.. يعني الـ8 أيام 512 جنيه.
يعني توتال 15 يوم غدا في الشهر= 1047 جنيه ونص.
احتياجات الطبيخ نفسها:
4 قزايز زيت من بتاع القلية الرخيص، القزازة بـ14 جنيه = 56 جنيه.
4 برطمانات صلصلة، البرطمان تقريبًا بـ9 جنيه= قول 40 جنيه.
توابل- ملح وكمون وفلفل أسود وحبهان وبهار= 50 جنيه.
التوتال= 146 جنيه.
خضار الأكل والسلطة:
5 كيلو بصل، الكيلو بـ3 جنيه= 15 جنيه.
كيلو ليمون- الناشف الصغير اللي مافيهوش ليمون= 15 جنيه.
10 كيلو طماطم، الكيلو بـ8 جنيه=80 جنيه.
4 كيلو خيار، الكيلو بجنيه ونص=6 جنيه.
10 كيلو بطاطس، الكيلو بـ4 جنيه= 40 جنيه.
يعني توتال الخضار= 156 جنيه.
المشاريب:
كيس سكر= 10 جنيه.
علبة شاي العروسة= 12 جنيه.
نص كيلو لبن في اليوم، يعني كيلو كل يومين بـ8 جنيه= 120 جنيه.
يعني توتال المشاريب= 142 جنيه.
رفايع الأكل:
نقول هيجيبوا 10 قزاز بيبسي 800 مل في الشهر، القزازة بـ4 جنيه ونص= 45 جنيه.
ونقول هيجيبوا مرتين فاكهة في الشهر= 150 جنيه.
يبقى كدة حسبة الأكل في الشهر كله= 2916 جنيه ونص كل شهر.
باقي احتياجات البيت:
صابونة= 5 جنيه.
مسحوق غسيل المواعين، القزازة بـ11 جنيه، تكفي شهرين= 5 جنيه ونص.
مسحوق غسيل هدوم الـ3 كيلو= 56 جنيه.
4 بكرات ورق تواليت من الرخيص= 17 جنيه.
شامبو، القزازة بـ 25 جنيه، تكفي شهرين برضه= 12 جنيه ونص.
معجون أسنان، 26 جنيه، قول الأنبوبة تكفي 3 شهور= 8 جنيه ونص.
كيس فوط صحية للغلبانة= 13 جنيه.
2 كارت شحن للاتصالات والإنترنت لأن مافيش واي فاي من أبو 50 جنيه= 100 جنيه.
التوتال= 217 جنيه ونص.
يبقى كدة بالصلاة على النبي، أكل وشرب واحتياجات ضرورية للبيت= 3169 جنيه في الشهر.
ده بدون إيجار الشقة، ولا الفواتير، ولا المواصلات.
بما إننا بنحسب، فخلينا نكمل الحسبة لآخرها بالمرة.
إيجار شقة= 1000 جنيه.
فواتير كهربا وغاز= 100 جنيه بالميت.
مواصلات، هنقول إنهم بيركبوا مترو، التذكرة بـ2 جنيه، يعني الواحد محتاج عشان يروح شغله ويرجع 4 جنيه في اليوم، يعني هم الاتنين 8 جنيه، والشهر فيه 4 أيام أجازة= 208 جنيه.
نحسب للغلبان علبة سجاير في اليوم، نخليه بيشرب من أم 21 مثلًأ= 630 جنيه.
ممكن حد يتعب فيحتاج دكتور- طبعًا هيروحوا عيادات المستشفيات الرخيصة، أو يجيبوا دوا، فهنحط ميزانية للدكاترة والدوا في الشهر 120 جنيه ليهم هم الاتنين، ويبقوا يبدلوا مع بعض بقى في المرض، كل واحد يتعبله شهر.
توتال الحاجات الأخيرة دي= 2058 جنيه.
يعني الحسبة كلها بسم الله الرحمن الرحيم كدة هتساوي 5227 جنيه في الشهر تقريبًا- ناقص كام جنيه أو زايد كام جنيه.
وده منتهي الاقتصاد يعني، الحاجات بأسعار الأماكن الشعبية، وبدون ما يجيبوا هدمة ولا جزمة- واللي جزمته اتقطعت ولا بنطلونه داب يرقعهم، وبدون شاور جيل- يستحموا بالصابونة، وبدون ما تجيب لنفسها قلم روج ولا علبة كريم، وبدون ما يكون عندهم تكييف- هي مروحة واحدة بينقلوها معاهم في الشقة، وبدون ما حد فيهم يجيب قزازة مزيل عرق ولا قزازة بارفان لنفسه، وبدون ما ياكلوا حاجة حلوة، وبدون نيسكافيه، وبدون سمك، وبدون ما يخرجولهم مرة حتى في الشهر، ولا يزوروا حد، ولا يعزموا حد، وبدون طفل، وبدون جمعيات، وبدون ما يقعد على القهوة، وبدون ما يركبوا مواصلة زيادة عن المترو، وبدون مياه معدنية- اللي مش كماليات بالمناسبة وفي ناس هتفهمني كويس.. وبرضه مرتباتهم مش هتقضي.
وأخيرًا الاتنين دول ماشافوش فيديو غادة عبدالرازق عشان مافيش عندهم واي فاي، ولو كانوا شغلوه بباقة الإنترنت بتاعت الموبايل كانت هتخلص.
ويرجع يشكرنا على إننا بتحمل مشاق الإصلاح الاقتصادي «بشموخ وصبر»، وبنتفهم القرارات الصعبة «بوعي وحكمة»، وبننظر إلى المستقبل «بثقة».. العفو يا ريس- ولو إني مش شايفة أيتها مستقبل.
منقول من Yara Ahmed Saleh
