- أنا دخلت لوحدي ٨٠% من إجمالي المساعدات لحد دلوقتي وانت بتشتمني.
- أنا رفضت التهجير وبقول على جثتي وانت بتشتمني.
- أنا جبت رئيس فرنسا عندي عشان يشوف الواقع عامل ازاي وبعدها دولته اعترفت بفلسطين وانت بتشتمني.
- أنا بتساوم على سد النهضة والغاز والديون اللي عليا عشان أوافق وأبيع القضية ورفضت كل ده وانت بتشتمني.
- أنا استقبلت كل لاجئي الحروب والمنكوبين وعاملتهم زي أهل بيتي وبقوا أصحاب بيزنس على أرضي وانت بتشتمني.
- أنا بفكر في المجاعة ومستقبل أهلنا هناك وبعمل خطة للإعمار خليت أوروبا كلها وافقت عليها وانت بتشتمني.
- أنا قفلت التمثيل الدبلوماسي مع المحتل ومفيش بيني وبينه أي قناة تواصل وانت بتشتمني.
- أنا خضت حروب حقيقية وضحيت بجنودي عشان الأرض دي وانت بتشتمني.
- أنا اتضريت في اقتصادي بسبب قناة السويس اللي اتقفلت ولما اتقالي اتوسط في إيقاف رد اليمنيين عشان قناة السويس بتاعتك تشتغل رفضنا وقلنا نشحت وما نعملش كدة وانت بتشتمني.
- أنا رغم اللي عملته ده كله حاسس إني مقصر ومش قادر أجازف لوحدي بالحرب عشان أنا هكون بنتحر وانت مش هتعمل حاجة غير إنك تشتمني.
عارفين انتو بقى عملتوا إيه غير إنكم تشتمونا؟
فيه منكم اللي دفع فلوس لنتنياهو وإعلامه عشان يشوه صورة مصر وفيه اللي بلده عملت تدريبات عسكرية مع الكيان في عز الإبادة، وفيه منكم اللي هرب وقت ما طلبنا منه ياخد موقف ثابت وما يخافش، وفيه منكم اللي فتح أرضه عشان الأنجاس يضربوا منها إخواته، وفيه منكم اللي التبادل الاقتصادي بتاعه مع الكيان زاد عن السنين اللي فاتت، وفيه منكم اللي جاب طيارة خاصة لترامب عشان يشتري أمنه وأمانه، وفيه منكم اللي كان بيزود جيش الكيان بقطع حربية للـF35 عشان تطلع تقصف وتدمر القطاع.
في النهاية أنا هفضل أعمل لإنه واجب اتكتب عليا وانت هتفضل تشتمني لإنك رخيص ودا مقامك الحقيقي..
