كل الكفاءات تتحين أول فرصة كي تقفز من المركب الخربة
الصوره دي فات عليها ٣٤ سنه !!
دي لاوائل الثانويه العامه في بورسعيد سنة ١٩٨٨ ..
قعدت افكر ... ياترى الاوائل دول فين في مصر دلوقت ؟
حيث ان دي دفعتي .. و انا كنت واحد منهم ( صورتي اللي في الخبر) ..
ح اكتب عن اللي اعرف هو وصل لفين منهم بدون ذكر اسماء ( 12 زميل ) ..
و ممكن حد من الزملاء يضيف او يصحح اي معلومات ..
.....
مهندس بأمريكا
طبيب بأمريكا
طبيب بفرنسا
مهندس مدني يعمل بين دبي و عمان و قطر
طبيب بانجلترا
مهندس بترول في ابو ظبي
طبيب قضى خارج مصر 12 سنه و عاد مؤخرا وسط نصائح كثيره بعدم الرجوع ! (كاتب البوست)
مهندس اتصالات حصل على الجنسيه الكنديه و رجع مصر بقاله سبع سنين و ندمان على الرجوع و نصحني ما ارجعش !!
طبيب بالرياض
مهندس مدني بالرياض
طبيب بالمدينه المنوره
مهندس يعمل بمجال اقتصادي بأحد البنوك في مصر
دول 12 من المتفوقين بالقسم العلمي ( علوم و رياضه) .. واحد فقط من ال 12 ... لم يعمل خارج مصر !!
يعني ٩٢٪ من المتفوقين سافر للعمل خارج مصر !!
تلاته منهم فقط ( من ال 12 ) موجودين في مصر حاليا !! يعني ٧٥٪ منهم خارج مصر حاليا !!
اربعه من ال 12 ( ثلث المتفوقين !! ) يحملون الان جنسية دوله اخرى حاليا !!
....
بالمناسبه..الاولى على الجمهوريه في نفس السنه..اخدت دكتوراه في الهندسه من امريكا و عايشه حاليا في انجلترا!
..
تخيلوا حجم المأساه !!
زمان كنا بندرس في كتب التاريخ .. ان الاستعمار ( خصوصا انجلترا) .. بياخد مننا المواد الخام ( خصوصا القطن ) و يصنعه و يبيعلنا المنتجات باسعار باهظه ...
الفكره دي في كتبنا بقالها سبعين سنه ... على اساس اننا ح نستقل بذاتنا في يوم من الايام و نصنع احتياجاتنا بدل ما الاستعمار يستغللنا ...
بعد سبعين سنه ... بقينا بننتج شباب خام .. و يطفش على دول العالم الاخرى ... وللأسف .. الاغلب ان شبابنا مش بيرجع !!
مازلت عند موقفي .. البلد دي مش ح تتقدم خطوه واحده غير لما تبقى جاذبه لعقول و سواعد ابناءها ... مش طارده لهم !
منقول.
