هوه مجال تخصصها تصميم فقط؟ مفيش تصنيع؟
منقول من صفحة فيس بوك استاذ تامر احمدوفقا لشرحه:
ا جدعان…
مصر بقالها سنين بتحاول تدخل في لعبة «أشباه الموصّلات» والعالم كله بيقول:
“دي صناعة صعبة… ومحتاجة علم وتقيلة وشركات عملاقة.”
المهم؟
امبارح… شركة عالمية قد الدنيا اسمها GlobalFoundries— واحدة من أضخم الشركات اللي بتصنّع شرائح إلكترونية في الكوكب ويكفي تعرف انها شركة منبثقة من عملاق البروسيسرات AMD اللي هي المنافس التقليدي لإنتل—
اشترت شركة مصرية اسمها Infinilink.
آه والله… شركة مصرية اتباعت لعملاق عالمي في التكنولوجيا.
ده مش خبر… ده فيلم مارفل!
طب إيه Infinilink أصلاً؟
دي يا سيدي شركة بتعمل حاجة محتاجة تتشرح ببساطة ، فأهو بالمختصر المفيد:
• أي مركز بيانات في العالم (زي اللي بيشغل الذكاء الاصطناعي وChatGPT والروبوتات وشغل الجنان ده)
محتاج يربط آلاف الأجهزة ببعض بسرعات مرعبة.
• السلوك النحاس؟ خلاص بقت زي الدش القديم.النحاس كان هو الموصل التقليدي للكهرباء لكن عيبه حاجتين ، بطيء و توصيله للكهرباء بيستهلك طاقة كبيرة بتروح غالباً كحرارة و علشان كده بنحط للبروسيسرات حالياً مراوح و احياناً تبريد بالسواىل زي رادياتير العربية و قصة كبيرة حضرتك
يكفي تعرف ان مراكز البيانات في العالم حالياً وبسبب كلمة صباح الخير اللي حضرتك بتقولها لشات جي بي تي دي بتستهلك كهرباء من ٠.٣ وات ل ٣ وات مع كل سؤال !! طبعاً مليارات الأسئلة حتستهلك برضه مليارات من الوات و بعض التقديرات بتقول ان كل سنتر من دول محتاج محطة طاقة نووية جنبه (مش تهريج وأمازون فعلاً اشترت كهرباء من محطة طاقة نووية في أمريكا علشان الداتا سنتر بتاعها و مايكروسوفت أشترت حق الحصول على كل الكهرباء من مفاعل نووي في بنسلفانيا لمدة ٢٠ سنة !!)
• الحل؟ الضوء!
تنقل data مشيّة نور… بالليزر… وبسرعات تجيب لك دوخة محترمة. التيرا بايت يا معلم
Infinilink بقى؟
هي الشركة اللي اخترعت المخيخ اللي بيخلي نقل البيانات ده يحصل بسرعة مجنونة وبطاقة قليلة…
لغاية وقت قريب كنا لما نحتاج ننقل البيانات بالضوء وده عادة كان بيحصل في الألياف الضوئية ( حتلاقي بعض البيوت في مصر دخلتها الياف ضوء فعلاً وراوتر WE بقى يشتغل بكابل الياف ضوئية بدل النحاس)
كنا بنحتاج نعمل نوعين من الدواير الألكترونية
نوع يتعامل بالنحاس و الكهرباء
ونوع يتعامل بالألياف و الضوء
و ده كان مكلف و بيستخدم طاقة كثير
شركة انفينيتي لينك المصرية بقى عملت ايه ؟
بقت من اوائل الشركات في العالم اللي قدرت تصمم وتصنع شريحة واحدة تجمع الضوء و الكهرباء في تشيب واحدة !!
بنسميها مونوليثيك سيليكون ، يعني شريحة مبنية على مادة السيليكون بنحط فيها ترانزستورات كالعادة ، بس كمان بنحط عدسات ضوء و مسارات ضوئية زي الفايبر بس جوه الشريحة و مرايات و قصة كبيرة حضرتك
يعني باختصار:
بيعملوا شرايين النور اللي بتشغّل عصر الذكاء الاصطناعي.
فـ GlobalFoundries قالت:
“طب هو إحنا ليه ما نشتريش الناس الجامدين دول؟”
وراحت واخداهم معاها!
وده معناه إيه لينا كمصريين؟
• إن فيه عقول مصرية بتنافس ناس في كاليفورنيا والصين وكوريا…
• وإن مصر رسميًا بقت جزء من أهم صناعة في العالم: الشرائح الإلكترونية
• وإن الحركة دي مش صدفة…الشركة دي مش اول شركة مصرية تتباع في المجال ده ، سبقها سيليكون فيجن اللي اتباعت للعملاق ساينوبسيس و سيس دي سوفت اللي اتباعت لأنتل و ساي ويير اللي عملت اول سبكترومتر على تشيب و ما اتباعتش لكن حصلت على تمويل بملايين الدولارات و ده اعتراف عالمي إن عندنا ناس فاهمة في التكنولوجيا الثقيلة.
يعني…
الخبر ده مش “استحواذ”.
الخبر ده “إحنا دخلنا كأس العالم بس للعالم الرقمي”.
فلو حد عنده ابن بيحب الإلكترونيات…
ما تكسروش في جناحه، أصل واضح إن اللعبة دي… بقت بتتعمل هنا.
مبروك لمصر
ومبروك لأي حد لسه مؤمن إن البلد دي فيها دماغ تعيش في المستقبل مش في الماضي.
Empowering Hyperscale Datacenters Building Energy-Efficient Ultra-High-Speed Connectivity Solutions
infinilink.ai
و ألف مبروك للناس العظيمة اللي كانوا وراء الأنجاز ده وعلى رأسهم الدكاترة العظماء Diaa Khalil Maged Ghoneima
وفريق الشركة العظيم طبعاً Ahmed Fakhry و Botros George Iskandar
و مستثمرين منهم مصريين زي شركة ايجبت فنشرز اللي تتبع وزارة الأستثمار المصرية
يعني الحكومة المصرية نفسها كانت مستثمر في الشركة دي و ده في رأيي من اكبر قصص النجاح اللي لازم تتبروز
شركة مصرية بتصنع أول روبوت صناعة محلية
