كلامك هذا إفتراء إني أتبني وجهة نظر BLM والأدلجة ما الأدلجة خليها لعمر الغامدي وخلينا نتناقش بالأدلة والواقع المشاهد.
نعم أمريكا بلد فيها أشرار<< مع أني ما قيد قلت الكلام ذا لكن أتفق معاك في النقطة هذي، أمريكا ليست ملاك ولا منزهة عن الخطأ وأمريكا أجرمت في حق الدول والشعوب وأحتلت العراق وأفغانستان و دمرت فيتنام وأستعملت أسلحة محرمة دوليا في حروبها، لكن هذا كله مو موضوعنا موضوعنا عن العنصرية.
مافي مسؤول في الدولة(عنصري) على اختلاف مكانته (رجل شرطة،قاضي..إلخ) يطلع ويقول إيوة أنا عنصري?، لكن إللي يفضحه هو تعامله مع الأشخاص من غير عرقه..والواقع يدل على ذلك. لذلك طلبك بتصريح من أحد المسؤولين بعيد عن الواقع.
لو لقيت رجال سود يعاملوا البيض كمعاملة الشرطة للسود حأقول إنهم عنصريين ولا أبالي لأني لا أدافع عن طرف ضد طرف يهمني العدل فقط.
كون عدد المقتولين من البيض أكثر مم السود بديهي ما يحتاجلها واحد ذكي عشان يعرف ليش يوم يعرف إنه أغلب الشعب أبيض. لو كانت في دولة أفريقية البيض فيها أقلية فسيكون العكس.
في قضية مكدول حتى المحققين التابعين لمكتب المدعي العام قالوا بأن أداء الشرطة كان ضعيف جدا لأن مكدول كان مصاب و مايقدر يرفع يده وما سبب أي تهديد للشرطة.
وفي قضية رودني لو الأفراد ما كانوا عنصريين كان ألقوا القيض عليه بدل من ضربه بشكل متوحش ولو القضاء في Simi valley كان منصف كان ما برء ال٤ وقامت المظاهرات وأعيدت مقاضاة الجناة.
هنا المصدر موجود فيه كل شي رسمي وموثق.
وأرجع وأكرر الحرب قامت عشان تحافظ على الأتحاد من الإنفصال أصغر مطلع -مو دارس حتى- للتاريخ الأمريكي حيعرف ذلك وإلا ليش ما حارب الإتحاد الولايات الحدودية زي كنتاكي إللي ما حررت العبيد إلا بكيفها عام ٦٥
وهذا كلام لينكون بنفسه لهوارس إللي يقول فيه إنه هدفه الحفاظ على الإتحاد.<<إلا إن كنت حتكذب الرجال هذا موضوع آخر.
بالنسبة لتحرير العبيد فإقتصاد الجنوب كان يقوم بشكل أساسي على الزراعة أي يعتمد على العبيد، لذلك إعلان تحرير العبيد شكل ضربة قاضية لأقتصاد الجنوب فضلا عن إمتناع الدول الأوروبية من مساعدتهم، حتى إنهم منعوا تصدير القطن لبريطانيا عشان يجبروها تدخل الحرب معاهم وما نجحت الخطة.
غير ذلك العبيد إللي هربوا من الجنوب أتطوعوا في الجيش الشمالي وقصدي بالعبيد واضح، إللي كانوا في الجنوب لأن الشماليين أحرار أساسا...وهروب العبيد من الجنوب والمناطق المحتلة مثل ناشفيل، ونورفولك وهامبتون رودز وتينيسي وتجنيدهم من قبل الشمال أضعف من قوة الجيش الجنوب لأنهم كانوا يعتمدوا عليهم أيضا في مساعدة الجنود. وضاعف من قوة جيش الشمال.
كلامك في الشكر عبارة عن مغالطة رجل القش، لأنه كلامك من الأساس كان إنه السود حقها يشكروا الدولة لأنها حمتهم من إللي كانوا يطردوهم في الجامعة والمدرسة، وكلامي كان إنه هذا حق للمواطنين على الدولة وهذي وظيفتهم سواءً تم شكرهم أو لأ هذي وظيفتهم.
فلا تدخل عاصفة الحزم والأطباء في الموضوع، فرق بين إنهم يسووا شغلهم والناس تشكرهم وبين إنهم يتمننوا على الناس بمهامهم لأنهم اختاروا وظيفتهم بأنفسهم ولو الناس ما شكروهم ما يعني إنهم يمتنعوا عن خدمة الناس زي ما قلت.
وعلى سالفة المقاطع إللي جبتها في مقاطع غيرها برضو تثبت وحشية بعض أفراد الشرطة في التعامل مع المتهمين والشرطي إللي خنق الرجال مجرم والشرطي إللي فلت على الرجال الكلب مجرم ويستاهل العقاب، لكنك ما تجرم الشرطي إللي دعس على رقبة الرجال ٥ دقايق لين مات وتعتبره غير محترف فقط. حتى أنا أقدر أجيب مقاطع للشرطة البيض وهم يعنفوا السود زي Eric وأقول شوف العنصرية. القضية مهي أجيب فيديو والسلام القضية كما ذكرت في تعامل بعض أفراد الشرطة بعنف غير مبرر له عندما يكون المتهم أسود مقارنة بالبيض.
ماذكرت إنه السود مالهم حقوق في التوظيف، ذكرت إنهم يواجهوا عراقيل أكثر من البيض والمقالات قدامك.طالما إنهم يحصلوا على وظائف أدنى من البيض وأوفر تايم أقل وغيره من العراقيل هذا ما يثبت وجود عنصرية؟؟
أجل أيش يثبتها؟؟ تبى ترامب يجي يقول والله نحنا فينا عنصريين ونعامل بعض السود بدونية، طلبك لتصريح زي كذا مع وجود الأدلة معناه إنك ياغافل عن الحقيقة يا تتغافل عنها.
العنصرية موجودة حتى في السعودية و وقفت على بعضها ورأيتها وشاهدتها بأم عيني، لكن حتى العنصري الذي مارس عنصريته لن يخرج ويقول أنا عنصري. بالعقل يا إسماعيل.
صراحة أتعجب من إستماتتك في نفي وجود عنصرية في أمريكا ما أدري هل كرهك لليسار يخليك تكره كل حاجة يتكلموا عنها حتى لو صحيحة..!!
