- إنضم
- 29 أغسطس 2019
- المشاركات
- 2,899
- التفاعل
- الدولة
اللى فى نص الصورة دي "فاطمة عبدالظاهر".. أخصائي التحاليل الطبية والمسؤولة عن سحب عينات تحليل الـPCR فى مستشفى العزل فى إسنا هي واحدة من جنود "جيش مصر الأبيض" اللى بيوصلوا الليل بالنهار عشان يقوموا بشغلهم فى الفترة الصعبة دي على أكمل وجه..
"فاطمة"بقالها 33 يوم متواصلين موجودة فى المستشفي بتشوف شغلها بكل حب، وشغف رغم إن مدتها الأولي اللى المفروض تكون 14 يوم شغل خلصت لكن هي صممت تكمل وسابت أسرتها وبيتها وقررت تكمل عشان المكان محتاجها لدرجة إن فيه 3 فرق طبية مروا عليها وهي زي ما هي!..
"فاطمة" بتقول: (أنا متعودة على تحمل المسؤولية من سن 18 سنة، واللى بعمله دلوقتي واجب وطني مينفعش أتأخر عنه.. كان من الواجب استمر في العمل، إحنا بنعيش حالة طوارئ)..
لغاية دلوقتي "فاطمة" سحبت 808 عينة تحليل PCR، والنتايج بتاعتها ما بين سلبي وإيجابي.. بتقول إن أسعد لحظات حياتها لما بتشوف عينة نتيجتها سلبية.. بتحاول "فاطمة" تنشر إبتسامتها على كل اللى بتتعامل معاهم فى المستشفي سواء زمايل أو مرضي، وبقت مع الوقت وبسبب طول مدة قعدتها فى المكان مصدر من مصادر الإيجابية للكل..
من كام يوم وطبعاً بعد إتخاذ كل التدابير الإحترازية والحماية؛ زمايلها فى المستشفي عملولها عيد ميلاد على الضيق عشان يخففوا عنها الضغط النفسي وتعب الشغل، وكان الموضوع مبهج فعلاً خصوصاً إنه كان مفاجأة ليها بالذات وهي بعيد عن أسرتها..
