طيب أنا دلوقتي ضربت عشوة ياباني من الطراز الفريد و هديت شوية بعد واحدة من أقذر ماتشات كرة القدم في تاريخ مصر ....مباراة العار
مش خافي على حد فيكم اني مش من أنصار حسام حسن و هحاول قدر الإمكان أكون منصف في البوست دا .....و كثير من الناس إعتبرت اني متحامل على حسام .....الحقيقة أنا مش باحلل نتائج .....ولا من أنصار الدعم لمجرد أني مصري ....لما أشوف كرة نضيفة و ذكية هقول انها كرة حلوة....لما أشوف كرة وسخة ....هقول انها كرة وسخة
حسام حسن من ساعة ما درب مصر و ما شفناش أي ملمح فكري لمدرب ....ولا في اختيارات اللعيبة ....الرجل كيرش جه في 4 شهور إكتشف نصف منتخب....ولا في التكتيك داخل الملعب .....كرة زي الخرة .....و كل الكلام إن حسام حماس و جرينتا و جرانيتا .....الكرة مش عافية ....عمرها ما كانت و عمرها ما هتكون ....الحماس ينفع لما يبقي عندك علم ....مقارنة الجوهري بحسم دي أكبر مهزلة سمعت عنها....الرجل الجوهري دا كان دحاح كرة ....رجل طور من نفسه و كان واخد بالعلم و بالأسباب .....انما حسام ماشي بالجعجعة و الوطنية الكدابة و جو هنكسب كاس أفريقيا زي ما حفرنا القنال و بنينا السد و تحيا مصر و تحيا محور روض الفرج .....و دا سبب ثاني خلاني قرفان من حسام إنه بيحاول يسيس الكرة بشكل رخيص و العملية بقت أصلاً آخر بضان خلقة
بالنسبة للبطولة دي ....حسام ما أظهرش إنه مدرب عنده حلول فعلا ....الرجل أخذ من سابقيه انك ترص اللعيبة وراء ....و على أمل إن هجمة مرتدة تلبس ....الكلام دا سواء مع فرق قوية ....أو مع بنين! .....الجوهري عكس ما ناس كثير ما بتدعي ما كانتش دي طريقة لعبه ....الجوهري انتهج الإسلوب دا بس مع الفرق اللي أقوي منه بكثير و عمره ما لعبها بالبجاحة دي! .....و ماحدش من فضلكم يقول القماشة كدا ! ....نعم القماشة جزء ....انما دي مصر ....و بنعرف نلعب كرة ....بس دا إختيار ....و هو إختار الجبن ....و خسر جبان ....عمري ما فهمت ما دام هتخسر كدا كدا ليه ما تخسرش و إنت مهاجم و بتحاول؟ .....مشكلتي مش إنه حاول يدافع، مشكلتي إن الدفاع دا مكانش فيه تفكير هيحصل إيه بده، مفيش أي تصور هجومي ازاي هتكسب الماتش غير بضربات الجزاء.....و دا جبن و فضيحة لمنتخب بحجم إسم مصر إنه يخرج ما شاطش غير شوطة واحدة و ماحدش يقول دا فرق مستوي احنا مش بنلاعب الأرجنتين .....دا إختيار تكتيكي حقير
عشان أكون منصف زي ما قلت في أول البوست ...حسام معاه لعيبة مش أحسن حاجة، انما هو حاول يعمل حاجة إنه يكتشف لعيبة جديدة؟ هل يعقل إن محمد هاني و الشناوي يكونوا أساسي في منتخب مصر؟ .....هل يعقل إن قلب دفاع منتخب مصر لسه ربيعة بيلعب أصلاً و احنا في سنة ٢٠٢٦؟
بعيدا عن حسام ....الماتش دا بالنسبة لي هو هيسدل الستار عن مرحلة حقيرة في تاريخ كرة القدم المصرية ....المرحلة الحقيرة هي إن مصر تفضل ١٢ سنة بتدافع و بترصص لعيبة وراء أكننا بنلعب في الثمانينيات ....كرة القدم الحديثة تخطت الأساليب الحقيرة دي .....الدفاع لازم يكون له معني ....مش بتدافع و ما عندكش أي تصور هتهاجم ازاي ......الدفاع و تبويظ المتشات دا عمره ما كان إستراتيجية ناجحة تكسب في كرة القدم ....و من فضلك ما حدش يقول سيميوني و إيطاليا زمان و الكلام ده لإن الناس مش بتعمل المصر بتعمله بقالها ١٢ سنة و اللي حسام حاول يعمله البطولة دي ....دا إسمه إفلاس .....قمة الإفلاس الكروي
لازم الناس تفهم إن اللي احنا بنلعبه في مصر دا مش كرة ....دا تهريج رسمي ...و هتفضل مصر الحالة المنكوبة دي حتي لو كانت وصلت النهائي النهاردة طول ما دوري مصر عامل كدا ....طول ما الأندية الجماهيرية مش موجودة و مش قادرة تخرج مواهب و مش بيتم دعمها....و هنفضل كدا طول ما معندناش عدد كافي من المحترفين عندهم أساسيات الكرة
وصول مصر النهائي النهاردة كان هيكون ظلم لكرة القدم ....و فوزها بأي بطولة أصلاً من ٢٠١٢ ظلم لكرة القدم ....أنا مشجع كرة ....و عمري أبدا ما هدافع عن كرة خرة حتي لو كسبنا بيها .....قعدتا تقولوا تكسب ولا تلعب ....ادينا ولا كسبنا ولا لعبنا و اتعمل معنا واحد كويس بصوت كابتن أحمد رفعت
منقول
