
إسرائيل قصفت قطر...
من شوية، جيش الاحتلال نفذ غارات جوية في قلب الدوحة، واستهدف قيادات ح.م*س وهي قاعدة بتناقش المقترح الأمريكي الأخير!

وبعدها بدقايق الجيش الإسرائيلي ومعاه الشاباك أعلنوا في بيان رسمي انهم نفذوا "هجوم دقيق استهدف قيادة ح**س العليا في قطر"... وده يعتبر تطور خطير جدًا وتاريخي في مسار الصراع...
طب ليه؟!

عشان دي أول مرة إسرائيل تعلن استهداف مباشر لقيادات المقاومة خارج غزة ولبنان، وعلى أرض وسيط رئيسي في المفاوضات زي قطر!

️ والأخطر كمان واللي مش كتير عارفينه أو واخدين بالهم منه، هو إن الاستهداف جه بعد يوم واحد من تقارير اتنشرت في كذا صحيفة عالمية بتقول إن قطر كانت بتحاول تضغط على حماس عشان تقبل العرض الأمريكي لوقف إطلاق النار، وانهم كانوا خلاص موافقين تقريبًا...
يعني الهدف الرئيسي من الضربة كان تدمير أي تقدم في المفاوضات، عشان ميحصلش أي توقف في الحرب...

طيب مين اللي اتضرب؟
القناة 13 الإسرائيلية قالت إن الضربة استهدفت شخصيات تقيلة زي خليل الحية وزاهر جبارين، لكن مفيش تأكيد رسمي بالأسماء لسه لحد دلوقتي... وبرغم ان في بعض بوستات السوشيال ميديا بتقول ان الوفد تم اغتياله بالكامل، إلا ان مصادر تانية زي شبكة الميادين والتلفيزيون العربي قالوا إن الوفد المفاوض نجا من محاولة الاغتيال...

وفي كل الأحوال، مجرد استهدافهم جوه الدوحة معناه إن العملية كانت محاولة لقطع رأس المفاوضات من أساسها... ودي سابقة خطيرة بيحصل فيها استهداف لسيادة دولة خليجية (المفروض) انها حليفة لأمريكا وعلى أرضها قواعد عسكرية أمريكية كبيرة (المفروض بردو) انها بتحميها!

بعد اللي حصل ده، الخارجية القطرية وصفت الهجوم بـ "الاعتداء الجبان"، وقالت إنه انتهاك للقانون الدولي وتهديد مباشر لأمن القطريين والمقيمين. قطر كمان أعلنت إنها مش هتتساهل مع السلوك الإسرائيلي المتهور، وإن فيه تحقيقات جارية وهيُكشف عنها قريب...


لكن في نقطة تانية خطيرة جدًا في الموضوع...

️ الدفاعات الجوية القطرية والأمريكية ما اتحركتش وقت تنفيذ الضربة دي خالص، برغم كمان انها (حسب كلام اسرائيل) ضربة جوية تقليدية اتنفذت بسلاح الجو الاسرائيلي، يعني مش صاروخ ولا طيارة مسيرة عادية...

️ ف يا ترى ليه الدفاع الجوي الأمريكي والقطري متحركش؟! خصوصًا إن القاعدة الأمريكية في العُديد مش بعيدة خالص عن مكان الانفجار... تساؤل مهم جدًا ولسه مالوش إجابة.