
إسرائيل دلوقتي بتضحك على العالم... بتصور قوافل المساعدات وهي داخلة، وبعدها بتسيب عصاباتها عليها عشان تسرقها بعد ما تدخل!
النهارده الصبح المفروض كان في ١٠٠ شاحنة مصرية ضمن قافلة زاد العزة اللي شايلة ١٢٠٠ طن من المساعدات الإنسانية لاخواتنا الفلسطينيين في غزة... الشاحنات دي بالفعل عبرت من معبر كرم أبو سالم وزكيم في اتجاه القطاع، بس بعد ما عدت، الاحتلال فضل موقفا لفترة طويلة قدام المعابر من الجهة المحتلة بدعوى التفتيش والفحص.. وفي الآخر سمحوا لعدد محدود منهم يعدي...

بس أثناء ما هما بيفتشوهم، كانت في حاجة تانية بتتحضر أخطر وأسوأ بما لا يقاس...
عصابات مسلحة تابعة للإحتلال بتعرف أماكن الشاحنات وأوصافها، وبتتسربلهم المعلومات، عشان يروحوا يهجموا على القوافل دي ويسرقوا الأغذية والمساعدات اللي جواها وياخدوها يبيعوها بأضعاف تمنها للناس اللي جوه!
ولحد دلوقتي معنديش فكرة كام شاحنة من الشاحنات دي وصلت للناس فعلًا وكام واحدة اتسرقت!

طب مين الناس دي؟
لحد دلوقتي محدش قادر يحددهم، بس غالبية الإجماع انهم عصابات صهيونية مسلحة، ومرتزقة عملاء تابعين لتنظيم أبو شباب المدعوم من إسرائيل!

طب ليه المقاومة مش بتأمن المساعدات؟!
حسب كلام الناس من جوه القطاع اللي متابعه على السوشيال ميديا، ف لما حما..س بتحاول تأمن المساعدات، بيتبلغ عنهم والاحتلال بيقصفهم علطول، ومش قادرين يعملوا حاجة.. كمان الخونة في وسط العصابات اللي بتسرق المساعدات دي كتير جدًا، وبيبلغوا عن أي حد تابع للمقاومة...

يعني اللي بيحصل دلوقتي هو ان إسرائيل بتستغل تنظيمات مسلحة عميلة زي تنظيم وميليشيا أبو شباب، عشان تنفي عن نفسها قيامها بأي جريمة تجويع متعمد، وبتقولك أهو احنا سايبين المساعدات تدخل بس هما اللي بيسرقوها من بعض، ويبيعوها للناس بمئات الدولارات!

طب هما مين ميليشيا أبو شباب دول؟!

المليشيات دي هي قوات مرتزقة غير نظامية وغير تابعة للمقاومة، أسسها شخص اسمه ياسر أبو شباب هو اللي ف الصورة ده

، ظهر فجأة بشكل غامض من حوالي سنة كده، وحما..س بتقول انه كان مسجون في قضية مخدرات وتهريب سلاح في غزة أصلًا قبل 7 أكتوبر، وهرب من السجن مع قصف اسرائيل للقطاع!

ياسر أبو شباب بقى بيقول عن نفسه إنه مجرد "مواطن فلسطيني عادي"، كان بيشتغل عامل بناء قبل الحرب وملوش أي خلفية عسكرية.. وان اللي خلاه يأسس الميليشا بتاعته دي هو انه عايز يحارب حما..س اللي بتسرق المساعدات من الناس وبتجوعهم وتقتلهم، وان هي سبب الحرب على القطاع...

وكمان بيقول ان السلاح اللي مع المرتزقة بتوعه مش من اسرائيل، بل هو واخده من قبيلته اللي هي قبيلة "الترابين".. وهدفه هو انه يسيطر على "منطقة آمنة" في القطاع هتكون الأساس بعد كده للمدينة "الإنسانية" اللي عايزة تبنيها اسرائيل عشان تسجن فيها أهالي غزة وتجبرهم على الهجرة من القطاع بلا عودة، واللي اتكلمت عنها ف مقال سابق!

️ بس خليني أقولك مفاجأة مش هتصدقها...
حسب كلام "سام روز" مدير وكالة المساعدات الإنسانية أو الأونروا في غزة في تقرير رسمي للوكالة، ف ميليشيا أبو شباب كانت متخصصة في نهب شاحنات المساعدات إللي بتدخل غزة من معبر كرم أبو سالم!
التقرير بيأكد إن عصابة أبو شباب كانت هي إللي بتنهب المساعدات في جنوب غزة قبل اتفاق وقف إطلاق النار اللي حصل من فترة وليست حما..س!
ومش بس كده... ده كان بيسرق المساعدات في مناطق مجاورة لوجود القوات الاسرائيلية كمان.. يعني مستحيل حاجة زي دي تحصل إلا بموافقة ضمنية من الاحتلال...

وخد بقى التقيلة...
اسرائيل دلوقتي بتلمع ياسر أبو شباب ده عشان يبقى هو السلطة البديلة اللي تحارب فصائل المقاومة في غزة نيابةً عنهم...
وفي سبيل ده، امبارح ياسر أبو شباب بنفسه نشر مقال كامل على أكبر جريدة اقتصادية وسياسية في أمريكا كلها، اللي هي وول ستريت جورنال Wall Street Journal... والمقال اللي اتسمحله بنشره في سابقة لم تحدث من قبل في التاريخ (برغم انه أصلًا مبيعرفش يقرا ولا يكتب)، بيقول فيه نفس الرواية الصهيونية بالضبط...


️ حما..س تستخدم الأطفال "دروع بشرية"، وهي اللي مسيطرة على وكالة الأونروا ومنظمات الإغاثة التابعة للأمم المتحدة، وهي اللي بتاخد المساعدات وتسرقها من الناس، واسرائيل مالهاش دعوة ومعملتش أي حاجة!

هسيبلك لينك المقال في المصادر تحت، ومعاه تقرير الأونروا اللي اتهمه رسميًا بسرقة المساعدات وارتكاب جرائم تانية

ودلوقتي نفس الشخص ده بصحبة ميليشياته من المرتزقة المسلحين، هما اللي بنسبة 99% بيسرقوا المساعدات اللي داخلة للقطاع بأوامر مباشرة من الصهاينة.. ونتيجة ده ان المجاعة ما زالت مستمرة والأزمة بتتفاقم، والاسرائيليين بيلعبوا بالإعلام وبينفوا عن نفسهم التهمة، وبيهدوا الرأي العام بإنهم بيمثلوا قدام الكاميرات انهم سمحوا بدخول المساعدات، وهما بيسرقوها ويدفنوها أو يدوها لتجار حرب يبيعوها بأسعار خيالية!

عمرك شفت إجرام وكذب أكبر من كده في حياتك؟!
ده اللي بيحصل دلوقتي قدام عيون الناس هناك في القطاع، واللي الإعلام بتاعهم مش عايزك تعرفه، والإعلام العالمي مش هيتكلم عنه طبعًا عشان يساعدوا في التخفيف من الضغط الشعبي والهياج اللي في الرأي العام على اسرائيل... وهتلاقي ان الكلام كله متوجه ناحية ان الأزمة بتتفك، وهي في الحقيقة بتصبح أسوأ مع كل دقيقة بتعدي...

ف يا ريت لو الكلام ده وصلك تشيره وتعرف ناس أكتر، لإن محدش هيتكلم عنه في الإعلام للأسف...
شكرًا.