منقول.
اللي بيحصل دلوقتي في امريكا أمر جلل
ترمب وقع في مغرس مالوش قومة بعده
ترمب بقي له سنتين عمال يعك و يخرب الدنيا و يدمر في مؤسسات الدولة و بيقترف جرايم عديدة لكن زي الزيبق ما حدش قادر يمسك عليه تهمة لأنه لئيم و بتاع تلات ورقات و كمان عشان السيناتورز من حزبه بيساعدوه و يغطوا علي جرايمه و رافضين انه يتحاسب قدام الكونجرس مهما عمل
ايه اللي جد النهارده من ساعة ؟
النهارده نانسي بيلوزي رئيسة الحزب الديموقراطي أعلنت رسميا انها ستبدأ التحقيقات في اخر جريمة عملها تمهيدا لعزله رسميا
ايه هي الجريمة الكارثية دي ؟
الاستعانة بدولة اجنبية لتغيير مسار الانتخابات القادمة لصالحه
القصة كما يلي
كل التوقعات و التنبؤات بتقول ان جو بايدن منافس ترمب هو اللي حا يكسب في نوفمبر ٢٠٢٠ فطبعا ترمب مذعور منه فراح كلم رئيس أوكرانيا الجديد في التليفون و قال له انه لازم يعلن عن فتح تحقيق جديد مع هنتر ابن جو بايدن و شريكه الاوكراني و يثبت عليهم تهمة فساد عشان جو بايدن يتعثر و ساعتها يقدر يغلبه
اصل ابن بايدن كان عنده بيزنس مع شركة أوكرانية و كانوا حققوا معاهم قبل كده في تهمة فساد و لم يثبت عليه شئ فترمب طلب من الرئيس الاوكراني يعيد التحقيق و الا فانه سيمنع عن أوكرانيا المعونة الاميركية و تقدر ب٤٠٠ مليون دولار و اللي كان الكونجرس سبق و وافق عليها
ابتزاز و مؤامرة واطية و شغل ضراير يعني
ازاي بقي المكالمة انفضحت ؟
القانون الاميركي بيقول ان كل مكالمات الرئيس لازم تتسجل و يستمع اليها فريق من الأمن القومي و يفرغوا الحديث و يبعتوه للبحث و التحليل في المقر الرئيسي و الرئيس عارف ده كويس الكلام ده طبعا مش من وراه
واحد من الفريق ده لما سمع المكالمة طبعا اتجنن لأن دي جريمة كبيرة مش هينة فراح قدم شكوي رسمية لرئيسه و طلب ان الكونجرس يحقق
رئيسه موالس مع ترمب فرفض يحيل الورق للكونجرس مع ان ده في صميم عملهم
الصحافة علمت بالخبر
النيويورك تايمز نشرت الخبر
السناتورز الجمهوريين حاولوا يغلوشوا عالموضوع كعادتهم بس المرة دي ماقدروش لأن الجريمة كارثية
ترمب بقي له يومين بيحاول يتحجج بأي كذبة بس الجريمة لابساه المرة دي مافيش فلفصة
و بعدين اخيرا النهارده نانسي بيلوزي قررت تبدأ إجراءات العزل الرسمية
و حا تبقي ليلة سودا علي ترمب
قولوا ان شاء الله
Semsem Mohamed