انا مش عايز اكرر نفس الكلام بتاع كل سنة , بس هقول شوية ملاحظات سريعة علي الجولة الاخيرة من خطة ترشيد الدعم فى 10 نقاط :
1 - دى المرة الخامسة , كتير فعلا , بس هي الاخيرة
.
2 - دي اقل زيادة للمواد البترولية من بداية برنامج ترشيد الدعم , متوسط الزيادات السابقة كان 38% , المرة دى 19.5%
.
3 - الهدف من اللى بيحصل مش بس ان الموازنة تحقق وفورات , لا , الهدف الحقيقي والمكسب الكبير هو انجاز مشروع اعادة هيكلة ثقافة الناس
.
4 - الدعم متلغاش , الدعم بيزيد واتخصصله اكتر من 327 مليار جنيه الموازنة الحالية
.
5 - دعم المواد البترولية بردو متلغاش علي كل المواد البترولية , الدعم مازال مستمر علي السولار والبوتاجاز والغاز واجمالي قيمته 52 مليار جنيه
.
6 - الناس اللى بتقول ان مصر من ارخص الدول فى العالم فى سعر البنزين بالدولار , دى ناس سخيفة فعلا , ياريت تتوقفوا عن اللى بتكتبوه دة , انتو مش بتساعدوا كدة ولو سكتت محدش هييجي يقول اللى قاعد ساكت ومتكلمش فى الدعم اهو
.
المسالة لا تقاس بسعر السلعة بالدولار , وانما بمعادلة اسعار السلع بمستويات الدخل وهنا هتلاقي ترتيبنا بيتراجع لاننا من الدول منخفضة الدخل من عشرات السنين ودى حاجة مش هتتغير فى يوم وليلة , الحكومة استلمتها شبه دولة مش دولة , وكمان منهارة , مستلمتهاش سويسرا , فبلاش تزييف للحقايق سواء يمين او شمال
.
6 - ازاي انتاجنا من الغاز بيزيد وفى نفس الوقت بنعلي السعر ؟
وازاي انتاجنا البترولي بيوصل لرقم قياسي وفى نفس الوقت بنعلي السعر ؟
.
احنا بنحرر السعر لنفس السبب اللى اكبر منتجي النفط بيحرروا/حرروا عشانه , امريكا محررة السعر رغم انها بتنتج يوميا 12 مليون برميل ومصر بتنتج 600 الف برميل , امريكا عندها احتياطي نفطي 50 مليار برميل ومصر عندها اقل من 4 مليار برميل , امريكا اللى اغني مننا الف مرة معندهاش دعم وقود ليه ؟ عشان نفس السبب المصري , تغيير الثقافة , اكيد هدفنا ضبط مالي وتقليل عجز الموازنة , لكن الثقافة هى الاخطر والاهم
.
المستهدف بنهاية اتفاقنا مع صندوق النقد فى نوفمبر 2019 , وبتطبيق الشريحة الاخيرة من ترشيد دعم الوقود يوليو 2019 , ان فى النهاية الناس افكارها تتغير , تتطور , تتحسن , ترتقي , تنتهي فكرة ان الحكومة هى اللى بتأكلنا وتشربنا وتشغلنا وتجوزنا , المبادرة الفردية , العمل الخاص , المشاريع الصغيرة ... هو دة المستهدف وهو دة المكسب الحقيقي , لو بنتكلم فى ان انتاجنا ضعيف مقارنة بنفس الدول اللى عندها نفس العدد السكاني والامكانيات وسبقتنا واحنا رجعنا لورا علي مدار عقود , دة سببه عقلية الناس قبل سياسة الدولة
.
السبب التاني. لتحرير سوق المواد البترولية , هو علاج تشوهات السوق , تدمير أي احتمالية لنشوء سوق سوداء من مهدها , جذب استثمار اجنبي , الاستثمار مستحيل يدخل فى قطاع مشوه
.
7 - ايه ايجابيات قرار النهاردة من وجهة نظر الاقتصاد ؟
هو راي غير شعبي , لكنه حقيقي وصحيح
وهو ان قرارات النهاردة بتعزز مصداقية الحكومة امام العالم
.
عشان كدة انا متفاجئ ومبسوط ولم اتوقع ابدا مستوي الالتزام الحكومي ببرنامج الاصلاح الاقتصادي ان يصل لهذه الدرجة من الانضباط والالتزام والحسم , لولا دعم الرئيس وقناعته بضرورة وحتمية الطريق دة مكنش البرنامج دة هينجح ابداً , الدعم السياسي كان غير محدود والثقة فى المؤسسات الاقتصادية (البنك المركزي والحكومة) كانت مطلقة واكبر من توقعات المؤسسات دي نفسها
.
ودة شئ مطمئن جدا بالنسبة للمستثمرين / الشركات / المؤسسات العالمية المراقبة والمتابعة للاقتصاد المصري وتضعه علي رادارها وتترقب رد فعل الدولة فى كل اختبار حقيقي , هل هترضخ للراي العام والجماهير والشعبوية ولا هتستكمل طريقها الغير شعبي والغير جماهيري لكن حتمي واقتصادي وصائب
وفى كل مرة الدولة بتنجح فى الاختبار
.
8 - انت مضايق ان دخلك انخفض بسبب موجات التضخم التالية لجولات ترشيد الدعم , دة طبيعي وحقك , اي انسان فى اي حتة فى العالم فى اي زمن طبيعي انه ينزعج ويغضب لما دخله ينخفض ...
.
لكن فى الحقيقة انت مش شايف غير النص الفاضي من الكباية , ودة بينقلنا لسؤال سخيف بتسأله فى كل حتة : امتي المواطن هيجني ثمار الاصلاح والتقشف , امتي هنحس بالفارق ؟؟
.
المشكلة ان اللى بيسأل السؤال دة انسان دخل جامعة وعايش معانا والمفروض انه متابع الشأن العام!!
.
8 - نيجي للاجابة وللنص المليان من الكباية , هل فعلا انت مكسبتش اي حاجة ؟ مفيش تغيير حصل فى حياتك ؟ كمثال وليس للحصر حصل فى حياتك المكاسب الاتية :
.
- انخفاض احتمالات اصابتك علي الطرق بنسبة 24% بفضل شبكة الطرق الجديدة
.
- فرص الفوز بشقة بسعر معقول وبالتقسيط , سواء محود او متوسط الدخل , فرصك زادت جدا بسبب ان الدولة قامت ببناء اكتر من مليون شقة فى اخر 5 سنين ودة مكنش موجود قبل كدة
.
- نصيبك من السلع التموينية زاد لـ 50 جنيه بدلا من 12 جنيه , يعني عبء مالي اتشال من عليك جزئياً , افضل من لاشئ
.
- لو بتشتغل فى الحكومة مرتبك زاد سواء كنت عند الحد الادني او فوق الحد الادني , الكل زاد واكيد زيادة الاجر مع التضخم افضل من استقرار الاجر مع التضخم , افضل من لاشئ
.
- لو بتشتغل فى القطاع الخاص , حضرتك لقيت وظيفة , وقدرت تحافظ عليها وشركتك بتشتغل بشكل طبيعي وبتتوسع , دة مش بفضل عبقريتك الفذة , دة بفضل حالة النمو الاقتصادي الجيد المتحققة بقالها سنين , لو السياسة الاقتصادية غير فعالة كان النمو هينخفض وحضرتك هتشحت وشركتك هتفلس
.
- لو مكنتش لاقي وظيفة وبعدها اشتغلت , دة بفضل المشروعات القومية الكبري اللى رفعت جودة الخدمات والمرافق , بس الاهم انها شغلت القطاع الخاص ونزلت البطالة من 13% لـ 8% وبالتالي انت لقيت شغل او اتخرجت لقيت مكان يعينك او غيرت من شركة لشركة
.
- الاستثمارات فى الخدمات والمرافق , ومنها خدمات اساسية زي الامن والطاقة والنقل والصحة , ادي الي تحسن اداء الخدمة وبالتالي دة انعكس عليك
.
مثلا كان عندنا 536 عملية ارهابية فى 2015, فى 2018 نزلوا لـ 8 عمليات فقط , اكيد دة له اثر علي حياتك اليومية
.
الكهرباء , كان فيه انقطاعات لان كان عندنا عجز بـ 6000 ميجاوات , تحولت لفائض بـ 10000 ميجاوات
.
كنت بتقف فى طوابير علي البنزينات , وكنت بتتخانق علي انبوبة بوتاجاز , النهاردة مفيش الكلام دة لان حصل وفرة فى العرض
.
- الوفر اللى اتحقق فى الدعم , ضبط المالية العامة , تشديد الانفاق الحكومي ومكافحة الفساد ... كل دة حقق عوائد بمئات المليارات اللى تم اعادة ضخها فى ملفات اخري زي مبادرة 100 مليون صحة اللى كشف فيها اكتر من 47 مليون مصري , اتعالج اكتر من 2 مليون مريض بفيرس سي , بداية نظام التأمين الصحي الشامل فى بورسعيد
.
- الوفر دة تم ضخه فى برامج مساعدة للفقراء والعاجزين ومن ليس لديهم مصدر دخل , برامج زي تكافل وكرامة , فرصة , اطفال بلا مأوي ... الخ
.
دة مهم جدا علي معيار الاضطرابات الشعبية وذكاء توزيع الثروة ونزع اي فتيل ازمة طبقية محتملة
.
وفى نفس الوقت الدولة عملت حملة للترويج لفكرة "2 كفاية" والسيطرة علي الزيادة السكانية , ومنعت الدعم عن اكثر من طفلين , وهنا مهم نتاكد ان الدولة مش بتشجع الفقراء علي مزيد من الفوضي فيما يخص حجم الاسرة بلا حساب او رقيب , المساعدة مرتبطة بمدي التزام المواطن بمعايير معينة ومن ضمنها نسبة الزيادة السكانية اللى موضوعة بالاعتبار وواخدة اولوية
.
- ميكنة بعض الخدمات الحكومية , توفير وقتك , تقليل المهدر من الموارد , التيسير علي الناس والعمل علي راحتهم
.
9 - دة النص المليان من الكباية اللى انت مش بتشوفه فى لحظة الغضب
كل دى فلوس كنت هتصرفها لو الحكومة مستثمرتش فى القطاعات دي
وبالتالي انت اه زادت الاعباء عليك , بس كسبت عوائد تانية بطريقة غير مباشرة , احسب التكاليف قصاد المكاسب هتعرف انك كسبان
.
10 - اسال نفسك السؤال بطريقة تانية , تاخد مرتبك زي ماهو والاسعار تفضل ثابتة كام شهر ... بس مع دولة منهارة ومعندهاش كهربا ولا بنزين والطوابير مالية المنافذ التموينية والمحطات , عندها ازمة ادوية وسلع اساسية ومش عارفة تستورد لان الاحتياطي ضاع وكل السلع فيها سوق سودا بتتباع باضعاف تمنها , ومفيش استثمار اجنبي ولا محلي , وبالتالي مفيش مشروعات وبالتالي مفيش شغل والبطالة توصل لمستوي تاريخي ومع الوقت تضيع الدولة ونضيع معاها وتنهار المؤسسات (بص لفنزويلا)
.
ولا الاسعار تزيد تدريجيا علي 5 سنين وفقا خطة اصلاح وتقشف تبني الاقتصاد وترمم تشوهاته وتستعيد سمعتة فـ تجذب الاستثمار وتخلق فرص العمل ونصنع دولة مؤسسات ومستقبل حقيقي ليك ولاولادك ؟ ايه الاختيار الاحسن
.
طبعا لو مكننا الناس من اتخاذ القرار , هيختاورا الاختيار الاول والدولة هتضيع
بس الحمدلله اننا لدينا قيادة سياسية حكيمة لا تخضع لاتجاهات الراي العام ولا ترضخ للشعبوية والكلام الفارغ والشعارات اللى مش بتبني الدول ولا بتصنع تنمية حقيقية
منقول من الباحث الاقتصادي محمد نجم
