49 نصيحة مهمة و انت رايح الجيش المصرى

amraay2009

صقور الدفاع
إنضم
4 أبريل 2010
المشاركات
7,749
التفاعل
18,379 0 0
15698234_566020950270653_2204468960576195637_n.jpg


بمناسبة ان اليومين دول موسم دخول الجيش دول 49 نصيحة مهمة و حاجات تجيبوها و انتوا رايحين مركز التدريب:

1- فلوس مش اقل من 600 جنيه

2- ادوية للبرد - الكحة - الامساك - الاسهال - استحلاب للزور -الصداع - مرهم للكدمات - مسكن

3- 3 اقفال كومبيوتر يكونوا نضاف عشان ميتكسروش و يكونوا حجم متوسط بلاش الكبير عشان مش هينفع

4- غيارات داخلية

5- بودرة رجلين

6- مزيل عرق

7- فرش جزمة طبي هتلاقيه ب 10 جنيه تقريبا من عند اي ورشة جزم هيفيدك عشان البيادة ناشفة

8- مكن حلاقة علي قد ما ربنا يديك و بلاش جيليت بلو 3 مش هتنفع معاكوا خليكوا في جيليت بلو 2 و هاتوا الكيس الكبير تقريبا هتحلقوا مرة كل يومين لو دقنك خفيفة و لو تقيلة كل يوم

9- يستحسن لو فووم حلاقة او جيل عشان تنجز بدل كريم الحلاقة و الفرشة و هات افتر شيف عشان التهابات بعد الحلاقة

10- فرشة سنان و لو مش بتغسل سنانك هتغسل في الجيش

11- معجون بقي عشان فرشة السنان

12- معلقة و دي حاجة مهمة جدا عشان الاكل و دايما حافظ عليها و سيبها في جيب الافارول عشان متنسهاش لو دخلت الميس (المكان اللي بتاكلوا فيه) من غيرها هتضطر يا تقوم يا تاكل بالكارنيه

13- خرطوم متر عشان الحمام بس لو عايز الاحسن لان احيانا بيمنعو دخول الخراطيم في شطافة بتتباع عشان الناس اللي بتسافر اسمها فريش باز سعرها 110 جنيه موجودة في الصيدليات الكبيرة زي العزبي هتنفعك خصوصا لما تكون المية مقطوعة و دا العادي يعني بس خليها دايما مليانة و خلي معاك ازازة مية شايلها للاستخدام في الحمام في دولابك و متقلقش محدش هيقول عليك فرفوور لان في الاغلب هيفكروها زمزمية

14- ليفة عشان تستحمي

15- صابون و صبانة بغطا و شامبو اكياس عشان تستخدم مرة و ترمي

16- فوطة و سيبك من الفوطة اللي هيسلموهالك

17- 3 اربطة جزمة بيج عشان لو رباط البيادة اتقطع

18- ممكن تاخد معلبات بس مش كتير و ممنوع تماما الاكل العادي طالما مفيش عليه صلاحية مش هيدخل

19- هتحتاج يبقي معاك سندوتشات كتير عشان يوم الترحيل طويل تقريبا اطول يوم ف جيشك

20- شريحة خط موبايل و تكون مشحونة عشان لو عرفت تسلك نفسك و تقفش موبايل من عسكري قديم تتكلم منه لو معرفتش بيبقي في كباين يتليفونات و بيتباع كروت شحن بتاعت مرحبا بس احتياطي تقدر تشتريه من اي سنترال المصرية للاتصالات بيبقي ب 10 جنيه

21- ممكن تاخد معاك موبايل صغير من غير كاميرا تخليه معاك بحيث لما تترحل تطمن اهلك بس اول ما تترحل مركز التدريب و يقولوا اللي معاه موبايل يسلمه في الامانات سلمه عشان لو اتقفش منك في التفتيش هيتكسر قدامك ,, الميزة هنا ان لما تيجي تمشي من مركز التدريب و رايح القوة الاساسية بتاعتك هيبقي معاك الموبايل و تقدر تسلكه بقي بس بالطريقة

22- لما تيجي تحلق احلق علي 1 او نص مش اقل عشان متبقاش زي المساجين ولا اكتر عشان متضطرش تحلق في الجيش بالمكنة بتاعتهم

23 - اكياس اريال الصغيرة عشان هتغسل بأديك هناك

24 - قصافة

25- وايبس و ديتول

26- كشاف صغير عشان الدنيا بتبقي ضلمة بليل في العنبر بيتباع ب 2.5 في المكتبات

27- ساعة تكون بتنور بردو عشان كل حاجة هناك بمواعيد

28- شرابات و نصيحة بلاش تلبس الشراب الميري ولا يووم و الاحسن لو شراب كوتينيل تقيل و طويل عشان رجلك متتعورش في البيادة

29- شبشب و يفضل يكون كروكس مقفول من الجناب عشان لو الحمامات فيها مية ع الارضية ولا حاجة

30- دوبارة تعلق فيها المفاتيح عشان هيدوك سلسلة بتجيب تنيا مع العرق

31- محفظة بسوستة تشيل فيها حاجتك و خليها دايما معاك في جيبك و متعرفش حد انت واخد معاك فلوس قد ايه

32- مراية صغيرة عشان لو الحمامات زحمة تعرف تحلق دقنك ..بس خلي بالك ساعات مبيدخلوهاش عالبوابة فحاول تسلكها

33- لما هتدخل هتعرف مصطلحات جديدة زي ميس و كحوول و جيشك حلبة و مستجد و رديف و جراية و زريير و سيكا و اخر واحدة دي الاسم اللي بيطلع علي اي حد اجازاته مستريحة فمتخدش ف بالك

34- قبل ما تروح هتبقي واخد فكرة ان كل الناس اللي هتقابلهم حرامية و كله بياكل في بعضه دي مش حقيقة بس بردو تاخد احتياطك و اوعي تسيب حاجتك برة دولابك

35- هتقابل ناس جدعة جدا و من كل حتة و هتبقوا صحاب بدون مصلحة و انتوا ف مركز التدريب فبلاش تاخد جنب و متعرفش حد بس بردو اختار اللي تقعد معاهم و خلي المقياس الوحيد الرجولة مش دا منين و دا مؤهل ايه

36- بلاش تشيل كذا شنطة و انت رايح مركز التدريب عشان هتبقي مش عارف تشيلهم ولا تشيل المخلة ولا تشيل البطاطين

37- لو داخل الجيش في الشتا ابقي هات معاك دفاية تحطها تحت البطاطين بتاعة الجيش عشان البطاطين مبتدفيش لوحدها

38 - هتلاقي دايما في حكاية ان في جن و عفاريت ف العنبر و الحمامات كبر دماغك دي حكايات

39- علاقتك بالتونة و الجبنة هتبقي علاقة مش هتتكرر بعد متخرج من الجيش فحاول تحبهم لو مبتحبهمش

40- البس حاجة مريحة و انت رايح يوم الترحيل عشان هتقعد كتير و حافظ عليها عشان لو نزلت اجازة في مركز التدريب

41- ابقي ادخل الحمام بليل عشان مفيش وقت الصبح و هتلاقيه زحمة

42- لو كباين التليفون علي طول عليها ناس و مش عارف تتكلم استني لما كلو ينام و اصحي الساعة 1 او 2 و اتصل براحتك

43- اما تروح وحدتك الاساسية اول حاجة تعملها تسأل العساكر القديمة عن كل حاجة ماشية ازاي في المكان بتاعك عشان تبقي عارف تعمل ايه

44- لو بتعرف كومبيوتر اول ما تروح دور علي العساكر بتوع الكومبيوتر و اتصاحب عليهم عشان ياخدوك معاك المكتب لان المكاتب اريح مكان في الجيش

45- و انت ف مركز التدريب بييجي مناديب من الاسلحة ياخدوا ناس ابعد تماما عن بتوع الصاعقة و المظلات و القوات الخاصة قولهم انك مكسح

46- نصيحة بقي للي لسة هيقدم و لسة مراحش كشف طبي لو طلعت بعد الكشف الطبي مكان اسمه الانتقاء و التوجيه هيسألوك انت فيك حاجة قولهم اي حاجة عشان مياخدوكش عشان دول بيودوا علي حرس حدود و صاعقة و قوات خاصة علي طول

47- لو عندك شكوي طبية حقيقية متفقدش الامل و متتكسفش عشان في ناس بتطلع ف افضل اعمل تظلم و متكسلش

48- متخليش اي حد يضايقك ف مركز تدريب لان دوسيهك بيكون مقفول .. و بتتحاسب اول ما تروح القوة الاساسية بس

49- لو انت بتدخن خد معاك 3 ولاعات و كمرهم عشان الولاعه هناك حاجة نادرة و غير كدا لو اتشافت بتتكسر و مش اكتر من 4 علب سجاير عشان الباقي هيتاخد

منقول
 
1000 جنيه ف مركز التدريب وبعد كدة ف الوحدة الاساسية 500 احتياطي كل شهر غير قبضك.. اي حد ف اي مكان يقولك اشتري من الوحدة بتاعتنا معلبات واكل دة بيحور عشان يبيع حتى الضولات بيعملو كدة لكن مفيش مكان ف مصر للجيش مفهوش كنتين فيه شيبسي وجبنة وتونة وكيك اينعممش كلهم بيبقو حلوين بس فيه .. ادوية لكل حاجة واللي يقولك سلم الادوية عسان هتتفتشو احشرها ف الشنطة مفيش تفتيش ف اي حتة كله بيبص من فوق ..الاقفال خد تلات احجام .. غيارات اي لون ونوع وشكل عشان اللي بيفتو ويقولو ممنوع بوكسرات دول بقر واهم حاجة الكلاسين القطن من قطونيل ..الجوانتي والكوقيه والايس كاب بصراحة معرفش نظامهم اي انا ف وحدتي عادي بس فيه اماكن بيرخمو فيها .. نصيحة وانتة رايح روح اي محل هدوم للجيش واشتريلك قايش او حتة التوكة بتاعته مش حديد لا هاتها توكة ملكي فيه واحدة زي اللي بيتربط بيها دراع شنط الضهر كدة بتبقى مريحة .. بودرة رجلين ومزيل عرق وازازة برفان صغيرة اوي .. فرش طبي ب100 جنيه من الصيدلية واختار بيادة واسعة على رجلك بمقاس عشان يتحط فيها بلاش الفرض ابو 10 بيتقطع تاني يوم .. مكن حلاقة جيليت عادي جدا بيقولو ممنوع ومحدش بياخدو منك وهيريحك لان مفيش ماية ف اماكن كتير فهتحلق ناشف فمتتعورش منه واللي دقنه حساسة عادي بتاخد من الدكتور هناك اورنيك دقن عشان متحلقش كل يوم .. فرشة سنان ومعجون وهات معاك سواك وخيط للسنان عشان غالبا مش هتغسل سنانك ولا حاجة وبالزات ف مركز التدريب عشان نفيش وقت .. معلقة ف كيس ومكنة حلاقة ف كيس دايما ف جيب افرولك احتياطي وغالبا مش هتروح الميز لانك مش هتطيق الاكل فيه.خرطوم دة هينفعك ف مركز التدريب انما القوى الاساسية ممكن ربنا يرزقك بمكان زي الي انا فيه مفهوش ماية ولا صرف اصلا ..
ليفة صغيرة وصابونة ديتول واي اكياس شامبو وشاور ..فوطة مع ان فوطهم مش وحشة بس صغيرة شوية وممكن يقرفوك ويقولولك بتتحط عالسرير كل يوم فمش هتعرف تغسلها غالبا .رباط للبيادة من الزقازيقي ف رمسيس بيخليك تفك البيادة بسرعة جدا من رجلك . فكك من المعلبات عشان هناك هتلاقي جبنة دومتي وعلب تونة كتير والتونة وحشة بس هتاخد عليها لانك مش طول جيشك هتجيب تونة من برة هتبقى شيلة عالفاضي المعلبات دي ..وللمرة المليون محدش بيفتش كله بيبص عالوش وخلاص.مش لازم سندويتشات كتير علبتين عصير واربع خمس سندويتشات وبس كفاية يعني فيه كنتين هتلك منه كيكتين وكيس شبسي وخلاص ..شريحة فودافون عشان فيه اماكن كتير مبيشتغلش فيها اتصالات وموبينيل واشحنها ولو حظك حلو ومركز تدريب محترم مش هتحتاجها عشان بيبقى فيه موبايلات ف الكنتين ورخيصة مش غالية الدقيقة..فكك من الكروت بتاعة المصرية للاتصالات عشان مفيش مكن شغال ف الجيش ..الموبايل لو هتكمرو ومش هيبان خدو المهم محدش يشوفك عشان صاحبك اللي عالسرير اللي جنبك هيفتن عليك عشان ياخد يومين زيادة ف الاجازة( حقيقة جدااااا).. الحلاقة على واحد فكك من نص دي وف القوى الاساسية فيه اماكن مش هتحلق فيها اصلا .. اكياس اريال صغيرة مش الكبير عشان هيبهدلك الشنطة .. قصافة صغيرة ومحدش غيرك يستعملها ..ابرتين وبكرة خيط ..وايبس ومناديل مثلا بكرتين مناديل وخمس او عشر اكياس مناديل من ام جنيه وكيسين وايبس صغيرين كشاف صغير قوى وحجرين احتياطي غير اللي فيه وبلاش كشاف الولاعة مبياكلش عيش هناك.. ساعة تكون بتنور ونضيفة ووتر بروف عشان متبوظش منك .. شرابات خفبفة اي لون وكام شراب صوف عشان لو داخل ف الشتا وفكك من شرابات الجيش لو محتاجها البسها ف الشتا فوق شرابك عشان تتدفا ..شبشب الجيش شغال وهيقضيها ف معظم مراكز التدريب ف القوى الاساسية لو لقيت الدنيا بايظة ف الحمامات تبقى قول لاي واحد نازل اجازة يجيبلك واحد كروكس مش لازم شيل عالفاضي انا روحت ورجعت بيه من غير مستعملو الكروكس دة..همة هيدولك سلسلة للكارنيه والمفاتيح شيل منها الكارنيهرعشان بيقع وخليه ف محفظتك .. خد كزا رباط جزمة قديم وطويل عشان لو احتاجت تربط حاجة..محفظة فيها سوستة ومتعرفش حد معاك كام وفيه اماكن هتحتاج تحط محفظتك ف بوكسرك بمعنى الكلمة عشان ميتسرقش بس متقلقوش مش كل الاماكن..مراية صغيرة اوي ومتسلمهاش لو قالولك ممنوع مفيش تفتيش..فك من الامصطلحات ومتسالش حد عن اجازة الا الظابط المسئول عن وحدتك ف القوة الاساسية غير كدة هيفتو عليك ..حاجتك ف دولابك والناس على حسب المكان ..متصاحبش حد متصاحبش حد متصاحبش حد ف مركز التدريب دي اول ناس هتعيط عليها اما تمشي من غيرهم ف مكان وثت التوزيع وهمة يروحو ف مكان تاني ومش هتعرفو بعض بعد كدة ..اها ياريت شنطة ضهر طويلة تلم فيها حاجتك او اي شنطة بتتشال كويس بلاش السامسونايت واللي بتجري بعجل والعريضة بتاعة السفر اللي بتتشال علر كتف واحد هتتفشخ ساعة المخلة والله..لو ف الشتا لاااااااازم دفاية..لازم يقولولكو ان فيه عفاريت وجن وتعابين..اللي هتروح بيه يوم الترحيل يبقى حلو عشان هتنزل بيه اجازة ولو داخل ف عشؤة خد جاكيت خفيف عشان هتنزل ف الشتا وهتتظبط..خش الحمام ف اي وقت ف اليوم ..مفيش كباين شغالة..لو ليك ف الوورد والاكسيل كويس جدا يعني بروفيشنال خش مكاتب افراد ووريهم شغلك لو مبتعرغش ياريت مترفعش ايدك عشان شكلك بيبقي زالخرا...اي اتوبيس ازرق وابيض ينزل منه ناس رتب وصولات وظباط لابسين تشيرتات نص كم ف الشتا ومكتوب على ضهرهم seal قولهم معيش الكارنيه ضايع ومش فاكر ارقامي ومتمضيس ف اي ورق ..نفيش دوسيه بيتفتح مفيش دوسيه بيتفتح مفيش دوسيه بيتفتح ف مركز التظريب اقسم بالله وف القوى الاساسية مش هيتفتح الا بمصيبة .. خدمعاك كزا ولاعة وسجاير لو بتدخن برضه .. شنطتك كل حاجة تبقى تحت وفوق تحط الهدوم عشان لو حد بيبص فيها ساعة التفتيش هيشوف الهدوم ومش هيلمس الشنطة اصلا ..اخر حاجة احب اقولها معاك واسطة معاكش واسطة .ربنا كاتبلك مكان هتقضي خدمتك فيه سنة اتنين ولا تلاتة ولا زيادة كلها بتعدي دة وقت وهيجري وانتة هناك او وانتة ف بيتك فمحدش يبص لغيره واخد اعفا ولا ف مكان مرتاح عشان متتعبش عالفاضي واحمد ربنا عاللي انتة فيه . انا ف اكتر مكان صعب ف مصر ف الخدمة وبحمد ربنا على اني مش ف اماكن كتير تانية..الحمد لله على كل شيء و بالتوفيق للكل

منقول
 
ذكرتني اول ما دخلت الكليه الحربية ،، ايّام متعبه ولاكن جميله ،، مرسيه ي قمر
 
45- و انت ف مركز التدريب بييجي مناديب من الاسلحة ياخدوا ناس ابعد تماما عن بتوع الصاعقة و المظلات و القوات الخاصة قولهم انك مكسح
؛ث:ذكرتني بـ
_310x310_a1186821f21d7ba2e8fde6d580d7adefb039662d5c98f90259b926775ce1dfa7.jpg
 
عودة
أعلى