لقد انتصرنا قاده اليهود قالوا هذا الم تسمع !
نتائج المعركه قالت هذا
هل تعلم ان حرب اكتوبر وقف التاريخ العسكرى طويلا لتحيلها وفحصها كما قال السادات رحمه الله
لان تلك الحرب اثبتت بما لا يدع مجال للشك فشل كلى لمراكز الدراسات حول العالم
وحطمت اسطوره الجيش الذى لا يقهر
اراعى حسره البعض من فرحنا بالنصر
لكن اليهود دائما ما يحرفون الحقائق
لن اتكلم عن مواجه جندى لدبابه لاول مره فى التاريخ لن اتكلم عن الوحد 73 قتال
لن اتكلم عن اى شئ اخر والقصص والبطولات طويله دعنا نسرد
انقل لك مقاله بسيطه لتفهم ان ما حدث من عبور هو من المستحيلات عند الامريكان والروس واليهود
-------------------------------------------------------------------------------------------------------------------------------------
منقول:
حقائق من حرب أكتوبر المجيدة:
خلونا نتكلم عن خط بارليف .. الخطوط الدفاعية بتتكون من عدد من النقط والدشم الحصينة جدا وبتكون مرصوصة على الأرض بترتيب هندسي بحيث كل نقطه تقدر تحمي نفسها وتحمي النقط اللى حواليها .. يعني لو حد حاول يقتحم نقطة حصينة فهيواجه القوة النيرانية الهائلة للنقطة دي والنقط الحصينة اللي حواليها في نفس الوقت
.
والدشم دي مصممة هندسيا لامتصاص أكبر قدر ممكن من الضربات النيرانيه سواء من الطائرات أو المدفعيه وبتكون محاطه بغابه من الألغام والشراك الخداعيه وبالفعل بيستحيل اختراقها .. وعامة في العلم العسكري وقبل حرب 6 أكتوبر كانت هناك قاعده أساسيه وهي استحالة الهجوم المفاجىء واقتحام خط دفاعي بالمواجهة .. وتاريخيا حتي خط ماجينو اللى أقامه الفرنسيين لمواجهة الألمان لم يتم اقتحامه بالمواجهة لاستحالة ذلك .. ولكن قاموا بخدعه عبقرية إنهم وضعوا قوات شكليه في مواجهة الخط وقاموا بالدفع بالتشكيلات الرئيسيه شمالا للالتفاف حول الخط عن طريق بلجيكا وهولندا واجتاحوا فرنسا .. وحتي بعد سقوط باريس لم يسقط الخط ولكن تم محاصرة القوات الموجوده فيه وتم استسلامهم تباعا بعد اتفاقية استسلام فرنسا
.
وحتى لما الحلفاء اجتاحوا فرنسا اجتاحوها بخدعه لاستحالة اختراق النقاط الدفاعيه الألمانيه الحصينه المواجهه بطول الساحل الفرنسي .. فقد خدعوا الألمان بأنهم حيقوموا بالانزال على شواطىء كاليه وقام الألمان بتعزيز دفاعاتهم هناك في حين أنه تم الانزال البحري في نورماندي اللى اهملت في استكمال بناء الخطوط الدفاعيه الخاصه بيها .. وحتى بالرغم من نجاح الانزال وعدم استكمال الخطوط الدفاعيه الألمانيه .. إلا أن الحلفاء تكبدوا خسائر فادحه حتي استكملوا الاستيلاء على شاطىء نورماندي.
.
نيجي بقي لخط بارليف
إسرائيل بنت نظريتها الدفاعيه على القاعده العسكريه اللى بتقول استحاله اقتحام خط دفاعي حصين بالمواجهه .. وكذلك استحاله إلتفاف القوات المصريه عليه سواء من الشمال لوجود البحر المتوسط أو من الجنوب لوجود البحر الأحمر وطبعا فيه سياده جويه لإسرائيل .. ومش بس كده .. إسرائيل درست كويس كل عيوب الخطوط الدفاعيه السابقه وتلاشاتها وطورت فيها كمان .. فأصبح بالفعل خط بارليف من أقوى الخطوط الدفاعيه في التاريخ.
.
فخط بارليف كان مجموعه كبيره من النقط الحصينه والدشم المحصنه يصل عددها إلى 36 موقع بطول 170 كيلو متر على طول القناه ومرصوصه بشكل هندسي معقد في شكل خطين منفصلين بعمق يصل الى 13 كيلو متر .. وتتصل الدشم دي بشبكة اتصالات مؤمنه تماما فيما بينها وبين بعض ومع مراكز القياده والسيطره .. كما أنها تتصل ببعض عبر أنفاق تحت الأرض لحريه التنقل بين الدشم وبها مراكز إعاشه مكيفه ومخازن للذخيره والغذاء ومراكز ترفيه وتستطيع تحمل الحصار الكامل وكافة أنواع القذف المركز بكل أنواع القذائف والقنابل لمدد طويله.
.
وكمان الدشم والمواقع دي محاطه بغابه هاااائله من الألغام الأرضية المضاده للدبابات والأفراد .. كما تتميز الأرض المحيطه بها بأنها منبسطه لمسافات كبيره .. لسهوله ضرب أي قوات بريه تقترب منها باستخدام كثافه نيرانيه عاليه جدا بمختلف العيارات سواء من الرشاشات الثقيله أو المدافع الثقيله ومساطب الدبابات .. وده كله مؤمن تماما داخل الدشم دي .. مش كده وبس .. ده التصميم الهندسي لكل موقع يتيح له حماية نفسه وحماية النقط الحصينه اللى قريبه منه .. وبما إنه مينفعش الالتفاف حولها ولازم الهجوم عليها بجنود المشاه بالمواجهه .. فمستحيل الاقتحام .. يعني من الآخر .. فعلا ملهاش حل غير القنبله الذريه زي ما أفتى كل الخبراء العسكريين سواء الغربيين أو حتي الشرقيين .. وبالفعل العلم العسكري ساعتها كان بيقول كده
.
مش كده وبس .. لم تكتفي إسرائيل بذلك إسرائيل عملت ساتر ترابي بارتفاع 20 متر بدرجة ميل حاده .. عشان تمنع أي تقدم للمركبات أو الدبابات لمواجهة خط بارليف .. وللأسف فيه ناس كتير بالغلط فاكره إن الساتر الترابي ده هو خط بارليف .. والساتر الترابي ده عشان يتم إزالته بعلم الهندسه العسكريه اللي كان موجود ساعتها أجمع الخبراء إنه عايز قنبله ذريه تانيه عشان يتم فتح فتحه واحده فيه .. وعشان تفتح 20 فتحه عشان الجيش بتاعك يعدي يبقي لازم ترمي 20 قنبله ذريه
.
نيجي بقي للمعضله الأكبر في قصه بداية الحرب وهي موضوع عبور قناة السويس نفسها .. ولو نلاحظ إن الجيش دايما يقول عبرنا ويركز على موضوع عبرنا دي بالذات قبل اقتحمنا .. طب إيه السبب .. وهو فيه بعد كل اللى حكيناه ده حاجه أصعب ؟؟ آه طبعا
.
بص يا سيدي .. قناة السويس تعتبر أصعب مانع مائي على مستوى العالم .. طب ليه ؟؟؟
قناة السويس هي مجري مائي عرضه ساعتها كان بيصل إلى 220 متر .. وحوافها شديدة الانحدار ومبطنه بالطوب والأسمنت و .. فلو حضرتك عايز تعمل عبور فلازم الأول تشيل الحواف دي، وده معناه ساعتها إنك بتعلن لإسرائيل إنك بتحضر للعبور فلازم الحواف دي تتشال في نفس وقت العبور ده هيحتاج معدات وحهياخد وقت كتير وحتشتغل وأنت تحت قصف مدفعي مكثف.
تاني حاجه سرعة التيار الشديده جدا واللي بتتراوح سرعته ما بين 18 متر في الدقيقه إلى 90 متر في الدقيقه الواحده في بعض المناطق .. يعني حضرتك بتعوم في شبه شلال طبيعي .. مش كده وبس .. ده اتجاه التيار بالقوه والسرعه العاليه دي بيتغير أربع مرات في اليوم من الشمال إلى الجنوب والعكس كل 6 ساعات.
.
وده معناه إنك لو حاولت تعبر بقارب في مساحه عرض القناه اللى هي في حدود 220 متر حتوصل الضفه الشرقيه بعيد عن النقطه المقابله للانطلاق بكيلو مترات .. ولو مجموعه بتعبر مع بعض ممكن يتفرقوا وكل قارب يوصل في مكان بعيد عن التاني .. طب ممكن مع التدريب إنك تحافظ على مجموعه صغيره من القوارب مع بعض في إطار المجموعه أو حتي السريه الواحده .. لكن إزاي تقدر تدرب جيش بالكامل أنه يعبر بالآلاف في نفس الوقت في الظروف دي ويوصلوا مع بعض وفي نفس النقطه ومحدش يتوه أو تتلغبط القوارب مع بعض .. أو يعدوا الناحيه التانيه ويقعدوا ينادوا على بعض ويلموا بعض في نص المعركه
.
مش بس كده .. ده فيه ظاهره تانيه أغرب من الخيال .. إن القناه فيها مد وجزر .. يعني الميه بترتفع وتنزل خلال اليوم الواحد بفرق يتراوح ما بين 60 سم إلى 2 متر كاملين في بعض المناطق
يعني بالعربي كده .. كل الكباري اللى كانت موجوده في الوقت ده عند أحدث وأكبر جيش في العالم متقدرش تصمد أمام قوه التيار ده وحتتقسم نصين .. ده غير إنه مع ظاهرة المد والجزر دي فلو اتبني الكوبري وقت الجزر حيعوم والتيار يسحبه بعد ما عرض القناه يزيد في المد والعكس صحيح
.
وعشان تقدروا تتخيلوا الصعوبه دي .. شارون لما عدى القناه في الثغره .. عدى على معديات .. ومكنش في الجيش الإسرائيلي كباري تقدر تتحمل قوة التيار في قناة السويس .. ولأنه خاف على نفسه أنه يعدي وميعرفش يرجع .. لأنه فاهم كويس أنه لو عدى واتقفل عليه الزمبيل وده اللي حصل بالفعل .. حتبقى مصيبه عليه ومش حيعرف يهرب تاني وحيتم القضاء تماما على قواته .. فساب لنفسه منفذ للهروب وحل موضوع العبور ده .. عارفين عمل إيه .. ردم القناه لمسافة حوالي 75 متر من كل ناحيه .. وقام مركب كوبري كده على ما قسم في المسافه الصغيره اللى في النص
.
واللى حل الموضوع ده سلاح المهندسين المصريين اللى اخترعوا كباري جديده تماما بحلول عبقريه لم يعرفها العلم الهندسي العسكري ساعتها وظهرت لأول مره في العالم أثناء العبور .. يعني الكباري اللى بنشوفها في الأفلام التسجيليه والتاريخيه دي تم إعادة تصميمها وتصنيعها بأيدي سلاح المهندسين المصريين لمواجهة قوة وسرعة التيار وظاهرة المد والجزر. (صنع في مصر)
.
مش بس كده .. إسرائيل جت حطت التاتش بتاعها ووصلت من تحت الساتر الترابي أنابيب متوصله على صهاريج مليانه نابالم .. بيتم التحكم فيها من داخل الدشم المحصنه .. بتحول سطح القناه إلى جهنم الحمرا في ثواني معدوده
.
عشان كده عبور قناة السويس كان بيعتبر أكبر تحدي أمام الجيش المصري لأن جنوده اتدربوا طوال 6 سنوات على اقتحام خط بارليف بحصونه ووجدوا حلول عبقريه محدش شافها أو درسها في أي أكاديميه عسكريه لاقتحام الدشم الحصينه باقتحامها بجنود المشاه فقط أو بالأصح .. بأسود شجعان لا يهابون الموت.
.
لكن التحدي الأكبر كان في إن العلم العسكري والهندسي والكيميا والفيزيا وكل العلوم الطبيعيه لسه مخترعتش حلول للتغلب على مانع مائى بالصعوبه دي تقدر توفر للجيش طريقه ينقل بيها دباباته ومعداته بالكامل للضفه الشرقيه
.
ولو قدر الجيش يتغلب على كل ده وده من رابع المستحيلات وقتها .. يا تري النظريات اللي وضعها اللي بتخالف كل النظريات والعلم العسكري في اجتياح خط دفاعي محصن بالمواجه هتنجح بالفعل؟؟
.
وحط كل ده بقى في كوم واللي جاي في كوم تاني خاااالص إنك بتحارب بمعدات متخلفه جيل أو اتنين عن العدو بتاعك اللى متفوق عليك كما وكيفا في السلاح .. وتحت تفوق جوي ليه .. وكمان تحت عيون الأقمار الصناعيه الأمريكيه اللى بتراقب دبة النمله 24 ساعه في اليوم
.
عشان كده الإسرائيلين كانوا نايمين ومتطمنين وحاطين في بطنهم بطيخه صيفي وآخر ما كانوا يتوقعوه (من وجهة نظرهم طبعا ) هو استحالة الغباء المصري بالرغبه في الانتحار والزج بالجيش المصري في آتون جهنم وأن الحرب هتتحسم من الساعه الاولي وبأقل مجهود ممكن لصالحهم.
.
تخيل بقى يا مؤمن إنك قائد عسكري وبتاخد قرار بالحرب وبتخطط وتلاقي حلول لكل المشاكل دي .. ولما ملقيتش أي حل في العلوم العسكريه .. قمت اخترعت وكتبت العلم ده من أول وجديد. والعالم كله بعد الحرب دي يرمي كتبه وعلمه في الزباله ويكتب من بعدك .. أو حتي لو كنت ظابط صغير وبتحاول تقنع الجنود بتوعك بالحرب في ظل الظروف دي اللى هما فاهمينها كويس .. وتلاقيهم مركزين على الطيارات المصريه ويعدوها طياره طياره ومع آخر طياره مستنوش أمر العبور ونزلوا اجتاحوا الكلام ده كله ودوبوه تحت بيادتهم زي الحلاوه السمسميه في أقل من 6 ساعات فقط
.
تخيل إن عقل المخطط العسكري المصري أنهى وللأبد عصر الخطوط الدفاعيه بعد ما اكتشف العالم أنه ممكن اجتياح أصعب الخطوط الدفاعيه في العالم بالمواجهه وعبور أصعب مانع مائي في العالم
.
القصه هنا إن العقيده القتاليه المصريه ودونا عن سائر جيوش العالم بتعتمد على المقاتل قبل المعده .. يعني لما فشل العلم وفشلت المعده في عبور القناه والقضاء على الساتر الترابي .. الحل كان في الجندي المقاتل .. فالجندي المصري هو اللى عبر وخلص قصة النابالم والساتر الترابي وحقول الالغام ولما خلص مهمته عبرت الدبابه والمعده العسكريه
.
فالجندي المصري فاجىء الجميع بحلول عفى عليها الزمن من عشرات السنين .. زي مثلا السلالم الحبال اللى اتلغت من المقرر العسكري من زمااااان أو مثلا العربيه أم عجلتين اللى كان بيجرها ورا منه بحبل .. ودي كانت فكره عبقريه .. أعطت الجنود المصريين خفة الحركه في نقل كميه هائله من الذخيره ونقل مدافع متوسطة العيار لمواجهة التحصينات والدبابات الاسرائيليه والتشبث بالارض حتي استكمال عبور الدبابات والمعدات الثقيله .. أو إن الجندي المصري عارف وموافق ومتدرب إنه ولمدة ساعات هيواجه الدبابات والمدرعات الإسرائيليه بمفرده بدون وجود أي مدرعات تحميه ولمده ساعات حتى استكمال عبور المدرعات المصريه .. ضاربا بعرض الحائط كل أساسيات وثوابت الحروب البريه .. وينجح في كده وغيرها كتيييييير من الحلول العبقريه.
.
طب خلوني اقولكم على حاجه تانيه محدش كتير اخد باله منها الأفلام والصور بتجيب عمليه إزالة الساتر الترابي باستخدام مضخات المياه .. بس دايما بتجيبها يا إما في أول المرحله أو نهايتها .. لكن اتحدى أن يكون في صوره (in between) يعني في نصف العمليه نفسها طب يعني ايه؟؟؟
.
بعد انتهاء الفتح في الساتر الترابي بنلاقيه مفتوح بجوانب حاده الانحدار تصل الى 90 درجه زي ما يكون حته جاتوه متقطعه بالسكين .. وتلاقي حائط الساتر الترابي متماسك زي ما يكون جبل صلب مش تراب .. طب ليه؟؟ وإزاي صمدت الجوانب الترابيه دي ولم ينهار أي جانب منها تحت الدك المستمر للأرض والتربه بواسطة جنازير الدبابات العابره ودانات المدفعية الثقيله اللي كانت بتستهدف الفتحات من جانب القوات الإسرائيليه؟؟
.
بلاش حاجه تانيه .. آلاف الأمتار المكعبه تم انزالها إلى قناه السويس وهو حجم هائل من الأتربه بارتفاع 20 متر .. ألم يكن كافي ردم شط الفتحه أو تحويلها إلى مستنقعات؟؟؟ وبالتالي صعوبة مد الكوبري ؟؟ لكن بنشوف إن الفتحه اكتملت والميه قدامها نضيفه تماما .. الله !!! التراب راح فين !!
.
الإجابات دي حتى اليوم سر من أسرار سلاح المهندسين المصريين اللى محدش يعرف عنها حاجه
.
معلش أنا طولت عليكم، لكن أنا متكلمتش غير عن عناوين فقط وليس بالتفصيل.
.
تحيا مصر وكل عام والجيش والشعب المصري بخير
#كلام_فى_الصميم
